Latest News

MNF Party in Pathian remruat ah an ngai

MNF Party chuan Serchhip bial Assembly bye-election neih zawh tak result chuan kum 2023 MLA General Election lo awm leh turah Serchhip bial-ah result duhawm zawk MNF in a neih theihna tura Pathian remruatah an ngai tih an sawi.

Nimin a thuchhuah an siamah MNF Party General Hqrs. chuan 26-Serchhip (ST) A/C bye-election fel leh thianghlim tak nei a, vote chhiar zawh thlenga buaina leh harsatna a awmlo chu lawmawm an tih thu tarlangin, MNF Official Candidate, Vanlalzawma tling zo ta lo erawh pawi an tih thu an sawi a. Amah duhsaka lo vote-tu zawng zawngte bakah, thlantlin a nih theih nana tha leh zung, ngaihtuahna zawng zawng sengtute chungah lawmthu sawiin, “Serchhip bial hmasawnna tura thlantlin a ni ta lo hi MNF chuan pawi a ti takzet a ni,” an ti.

Serchhip bial chu kum 40 dawn, kum 1998-2003-a MNF Candiate K.Thangzuala (RIP) thlantlin a nih tih loh chu MNF la tlin ngai reng reng lohna bial a ni tih sawiin MNF Party chuan, kum 2018 inthlanpui-a pathumna dinhmun-a an din laiin tunah chuan pahnihna ah inhlangkaiin Vote 1006 zetin an pun belh tih an sawi a. “Bye election-ah hian Congress tlachhe nasa lutuk leh vote tlan darh nasa lutuk chu ZPM lamin an hlawkpui ta a, MNF chuan kan tlinloh phah ta ah kan ngai,” tiin ZPM Party anga MLA Official Candidate hmasa ber leh thlantlin hmasa ber awmchhun, MLA atana lakluh mai tur Lalduhoma chu duhsakna an hlan thu an sawi bawk.

Comments

Chhiar Hlawhte