Latest News

Mizoram-ah nitin PPE 500 bawr vel hman a ni

Health Minister Dr. R. Lalthangliana chuan Mizoram-ah nitin Personal Protective Equipment (PPE) 500 bawr vel hmang ang kan nih thu a sawi.

Dr Lal PathLabs, Bazar Bungkawn, Aizawl ten nimin a PPE Set 3000, Rs. 28,50,000/- man hu Mizoram sawrkar hnena an hlanna hun nimin-a a Pisa-a neih ah he thu hi a sawi a, Dr. R. Lalthangliana chuan ten Health Minister, Dr. R. Lalthangliana Pisa-ah an hlan a, he hunah hian Health Minister chuan COVID-19 hri leng dona kawngah mamawh chi hrang hrang tam tak a awm thu leh chung zinga chuan Sample Test Kit leh PPE te chu kan mamawh zual bik, a tel lova kan awm theih miah loh a ni tih a sawi a. PPE Kit phei hi chu ZMC-ah ringawt pawh nitin 200 chuang hman a nih thu leh Frontline Workers Sample la tu, Laboratory leh COVID-19 hri kai enkawlna hmuna thawkte leh midang dangin an hman nen chhut phei chuan nitin 500 bawr vel hmang ang kan ni tih a sawi a. Heng te hi a leina tur nei mah ila ramchhung kiltin atangin mamawhna a san avangin lei tur chan a har thu leh duh hun hunah an chah thlen theihloh thu a sawi a. “Kan mamawh zual lai tak maia Dr Lal PathLabs ten 3000 lai min rawn pe hi thinlung takin lawmthu ka sawi a ni,” a ti bawk.

Health Minister chuan tunhnaiah hri kai kan tam avang leh sample test ngai an tam chak em avangin Sample Test Kit pawh a hek hle tih sawiin, TrueNAT Laboratory-a hman tur pawh a khawl siamtu Molbio Diagnostics Pvt. Ltd., Goa ami te siam Test Kit lo chu hman theih a ni lova, cheng vbc. 1 chuang man Order sa pawh ram pumah Thlawhtheihna service a mumal loh avangin niminpiah-ah a rawn thu leh nimin khan District hrang hrangah semdarh a ni tih a sawi a. Ventilator tha chi 35 an order zingah 25 chuan niminpiah khan Kolkata rawn thleng tawhin, a siamtu company engineer ten an remkhawm mek thu sawiin, karleh Thawhlehni khian a rawn thlen a beiseiawm tih a sawi a, Ventilator pakhat man hi cheng nuai 13 vel a nih thu a sawi.

Dr. R. Lalthangliana chuan COVID-19 dona kawngah rampawn hmun hrang hrang atangin tanpuina kan dawng reng tih pawh sawiin, nimin-ah pawh Singapore atanga Oxygen Cylinder Type-B (10 litres) 50 kan dawn chuan Mizoram a rawn thlen thu leh Kuwait atanga dawn Jumbo cylinder (40 litres) thunkhah sa 180 chu Guwahati atang motor lian-a rawn phurh mek a ni, a ti bawk. Mipuite chu inveng fimkhur tura chah nawn lehin sawrkarin an sahimna tura ruahmanna a siamte zawm tha hram hram turin a ngen bawk. Nimin-a Dr Lal PathLabs-in PPE set 3000 hlan hi full set niin Face Mask, Face Shield, Mit venna Goggles, Hand Gloves, Pheikhawk tuamna, Lu tuamna, Suit leh a paihna tur (bag) a chhawm a, set khat hi Rs. 950/- man a ni.

Comments

Popular News (Last 30 Days)