Mizoram-ah hri kai thar 74; Dam thar 66 awm

Pathianni-a Mizoram-a Sample enfiah atangin COVID-19 hri kai mi 74 zet hmuhchhuah leh an ni a, Mizoram-a hri kai hmuhchhuah chu 6358 an tling tawh.

Pathianni khan ZMC Laboratory-ah Sample enfiah awm lovin District hrang hranga TrueNat Laboratory-ah Sample 30 enfiah niin hri kai mi 4 hmuh an ni a, heng hri kai hmuhchhuah te hi Saitual District-a North Lungpher khua ami te vek niin tunhnaia hri kai nen inkawmhnaihna neih avanga inkhunghrang lai an ni a, chhungkhat hnai vek an ni.

Pathianni khan Mizoram-ah Rapid Antigen Test hmangin Sample 1201 enfiah niin hri kai 70 hmuh an ni bawk a, an zinga mi 42 te chu Aizawl District-a hri kai hmuhchhuah niin an zinga 21 te chu hri an kaina hriatloh an ni thung. Lunglei District-ah hri kai 18 hmuhchhuah an ni a, an zinga 17 te chu Tlabung khaw mi, tualchhung-a hri inkaichhawng an ni a. Lawngtlai District-ah hri kai 8 hmuh niin Kolasib leh Saitual District-ah hri kai pakhat ve ve hmuh an ni bawk.

Mizoram-a COVID-19 hri kai enkawl zingah nimin khan mi 66 te chu hri lakah fihlimin anmahni enkawlna hmun atanga chhuahtir an ni ve leh bawk a, heti hian nimin tlai dar 5:00 thlenga Mizoram-a hri kai hmuhchhuah tawh chu 6358 niin heng zinga 5112 te chu enkawl dam an ni tawh a, hei hi hri kai hmuhchhuah atangin zaa 80.40 niin tunah hian hri kai enkawllai 1229 an la awm a, Aizawl District chu hri kai enkawllai tamna ber niin mi 874 enkawllai an la awm a ni.

Hri kai zingah nunna chan awm belh leh :

Mizoram-a COVID-19 hri kai enkawl zingah nimin khan nunna chan mi pakhat awm lehin Mizoram-a hri kai nunna chan chu mi 17 an tling tawh. Nimin-a Mizoram-a COVID-19 hri kai nunna chan hi James Lianmawia (55) niin Aizawl Kanan Veng ami a ni a, April 15, 2021 khan COVID-19 hri a kai tih hmuhchhuah niin ZMC-ah enkawl nghal a ni a, hemi hnu hian Stroke a nei tih hmuhchhuah leh niin nimin tlai dar 4:15 khan ZMC-ah hian a boral zui ta a ni.