Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Mizoram-ah hri kai thar 207 leh dam 195 awm

Niminpiah khan Mizoram-ah Sample 1963 enfiah leh niin heng atang hian COVID-19 hri kai 207 hmuh belh leh an ni a, Sample enfiah atanga za zela 10.54 zetin hri an kai a ni.
Niminpiah khan ZMC Laboratory chu tihfai a nih avangin Sample enfiah a awm lova, District hrang hranga TrueNat Laboratory-ah Sample 198 enfiah niin heng atang hian hri kai mi pakhat hmuhchhuah a ni a, hri kai hmuhchhuah hi Mamit District ami niin hri kai tawh nen inkawmhnaihna neih avanga In lama inkhung-hrang lai a ni.

Niminpiah khan Mizoram-ah Rapid Antigen Test hmangin Sample 1765 enfiah ni bawkin heng atang hian hri kai 206 hmuhchhuah an ni a, an zinga 155 te hi taksa-a hri kai lanchhuahna nei niin midang 51 te hi hri kai lanchhuahna neilo an ni thung. Hri kai hmuhchhuah zinga 94 te chu Aizawl District-a hri kai hmuhchhuah niin an zingah hian hri kaina hriatloh leh chhui zui ngai 38 an awm a ni.

Lawngtlai District-ah hri kai mi 48 hmuh niin an zinga 32 te chu Kamalanagar-I ami niin hri kai tawh nen inkawmhnaihna nei an ni a, Kamalanagar-II ah pawh hri kai mi 13 zet hmuhchhuah an ni bawk. Hei bakah hian Lunglei District-ah hri kai 44 hmuh niin an zinga 38 te chu Lunglei Electric Veng ami an ni a, hri kai nen inkawmhnaihna nei mi 36 zet an awm a ni. Serchhip District-ah hri kai mi 10 hmuh an ni a, Kolasib District-ah hri kai mi 6 hmuh niin an zinga 4 chu Bairabi ami an ni a, Mamit District-ah hri kai mi 4 hmuh an ni bawk.

Heti hian nimin thlenga Mizoram-a COVID-19 hri kai hmuh tawh chu 11,143 an tling ta a, nimin khan hri kai zingah mi 195 te enkawl dam leh niin heti hian nizan dar 10:00 thlenga Mizoram-a hri kai enkawl dam chu 8487 an tling tawh a, hei hi hri kai hmuhchhuah atanga chhutin za zela 76.16 a ni a, tunah hian hri kai enkawllai 2622 la awmin hri kai zingah nunna chan mi 34 an awm tawh bawk a ni.

Comments

Chhiar Hlawhte