Sangha Dil nei zingah harsatna tawk pung zelin Sangha thi quintal 5 aia tam a awm

Kumin Thal chhunga khawkheng rei lutuk avanga Sangha Dil nei harsatna tawk chu Serchhip District-ah chhungkaw 43 zet an tling tawh a, khawlum leh tui harsa avanga Sangha thi pawh quintal 5 aia tam a awm bakah Sangha a nung chunga man pawh tam tham tak a awm tawh nia thudawn a ni.

District Fisheries Development Officer (DFDO) Serchhip hnen atanga thu kan dawn danin kumin Thal chhunga khawkheng nasa lutuk avanga harsatna tawk Serchhip District chhunga Sangha khawitute leh an harsatna tawh dan hi lakkhawm mek zel a ni a, nimin thleng khan harsatna tawk in report hi mi 43 tling tawhin Sangha thi zat hi kg. 552 zet a tling tawh a, hei bakah tui tlem avanga Sangha a nung man chu kg. 1706 tling tawh bawkin Sangha note thi 4112 chhinchhiah a ni bawk. 

Khawkheng avanga harsatna tawk hi Serchhip Circle-ah mi 10 in report awmin Sangha thi kg. 120 vel awmin a nung kg. 700 vel man a ni a, Khawlailung-ah chhungkaw 5 ten harsatna tawkin Sangha thi kg. 99 vel awmin a nunga man kg. 80 vel awm a. Lungkawlh-ah chhungkaw 8 ten harsatna tawkin Sangha kg. 29 thiin a nung in kg. 116 man a awm bakah Sangha note thi 2242 a awm a, North Vanlaiphai-ah chhungkaw 11 ten harsatna tawkin Sangha thi kg. 168 awmin a nung a man kg. 635 a awm bakah Sangha note thi 650 a awm bawk.

Chekawn, Lungchhuan leh Leng khua ah chhungkaw pahnih theuh ten harsatna tawkin Lungchhuan-ah Sangha thi Kg. 1 leh Chekawn-ah kg. 30 a awm a, Lungchhuan-ah a nung chungin kg. 30 leh Leng-ah kg. 20 man niin Leng-ah hian Sangha note 400 a thi bawk. East Lungdar, Bungtlang leh Hriangtlang-ah chhungkaw pakhat theuh ten harsatna an tawk a, Bungtlang-ah hian Sangha thi kg. 35 awmin a nungin kg. 120 man a ni a, Hriangtlang-ah Sangha thi kg. 70 awmin Sangha note 120 a thi a, East Lungdar-ah a nungin kg. 5 man a nih bakah a note 700 a thi bawk.

Heng harsatna tawk hrang hrangte leh harsatna an tawh dan te hi Fisheries Department-a Director leh District Disaster Management Authority, Serchhip hnenah thehluh a nih dawn thu Serchhip DFDO chuan a sawi bawk.