Latest News

Cheng nuai 438.52 senga 'Integrated Tourist Circuit' sak hna zawhfel tep a ni tawh

Serchhip Bawngchawm tlang a cheng nuai 438.52 senga 'Integrated Tourist Circuit' sak hna thawh mek chu thla thar June thla khian zawh hman an inbeisei tih helai hmuna hnathawktute chuan an sawi a. Helai hmun hi a khaw neitu ten neitu thinlung pu chungin uluk takin enkawl se an duh thu an sawi bawk.


Bawngchawm tlang Paragliding Take-off hmun a 'Integrated Tourist Circuit' sak mek hi nimin khan Serchhip-a thuthar thehdarhtu thenkhat ten tlawhin hnathawh dan an en a. Helai hmun tlawhtu thuthar thehdarhtute hi Mizoram Aero-Sports Association (MASA) General Hqrs. President J. Vanlalliana leh MASA Sub-Hqrs. Serchhip President, C. Lalhminghlua ten lo dawngsawngin an hnathawh dan an hrilhfiah a, he hunah hian MASA hruaitute chuan kum 2010 atangin Serchhip-ah hian Para-Gliding hmunhma tur hi an lo zawn tawh thu leh a tirah Zawlpui Phai-a Tlangcheng ram ah bul an lo tan tawh thu an sawi a, a hnuah Chuanhnuai-a NH. 54 hnuaiah Para-Gliding Take-Off hmun siamin kum 2011-ah Festival te pawh an lo thlen tawh thu an sawi a. Hemi hnu hian ram zawng zelin tuna an hmunhma, bigha 8 vela zau hi a neitu VC ten pe in an cheibawl tak thu an sawi a ni.

MASA hruaitute chuan helai hmun cheibawlna atan hian kum 2019-ah NEC-ah Project siamin sum an dil thu leh sum hi hmuh ngei an beisei avangin cheng nuai 120 loan la in hemi hmalam hian bul an tan thu an sawi a. Amaherawh chu NEC atang hian nikum May 28-ah sanction hmuh chauh a nih thu sawiin, a hmaa hma an lo lakna pawh chhunzawm zel a nih thu an sawi a, tunah hian hna thawh tur tam tak thawk zo tawhin a tirah kumin May thla a zawh tum mah se hri leng avanga harsatna an tawh thu leh heti chung hian thla that June thla ah chuan zawh ngei an inbeisei thu an sawi bawk.

MASA hruaitute chuan helai hmuna hmalakna lian berah a mikhual thlen theihna hmun tur sak a nih thu sawiin, he Guest House hi Para-Gliding tan chauh nilo, mikhual a duh apiangte tan hman theih a ni dawn tih an sawi a, Guest House-ah hian Room 15 awmin mikhual thlen theihna turin Room 11 buatsaih anih thu leh a rualin mikhual 30 vel thleng thlen theih a ni dawn tih an sawi a, Room dang chu thawktute awmna tur bakah chaw eina hmun tura te pawh siam a nih thu an sawi.

He building hi Pre-Engineered Building kalphung a sak niin Mizoram-a a hmasa ber tur anih thu an sawi a, In bang atan hian Fibre Cement Board hman niin a chhunglam leh pawn lamah hman ve ve a ni a, a inkar ah hian Thlasik leh khaw-lum a boruak nuam tawk a vawng thei turin Rock Wool phum ani bawk. In an sak dan chu a tha tawk tih mithiam ten an pawm thu sawiin, ruah, thlipui leh lirnghing-ah te pawh chim chhe mai mai lo tur anih thu a sawi bawk.

MASA General Hqrs. President, J Van-lalliana chuan helai hmun hi Serchhip mipuite tan mai nilo, Mizoram tana Tourist hipna tha tak anih dawn avangin Serchhip mipuite pawhin neitu rilru pu in a enkawl zuina ah pawh mawh kan phur tlang dawn tih a sawi a, helai hmun vawnfai chungchang ah a tlawh thintute chu tan la thar tura chahin, hnawm-hnawk kalsan mai thin lo turin a ngen bawk.

MASA hruaitute chuan tuna hma an lakna tur zingah Paver Block chu a kawng-ah phah vek an la tum thu leh building peihfel bakah Paragliding Take-Off Point-ah Mexico atanga chah phul phah an la tum thu an sawi bawk.

Comments

Chhiar Hlawhte