Latest News

Mizoram-ah hri kai hmuhchhuah an la pung zel

Inrinni khan Mizoram-ah Sample 2465 enfiah leh niin heng atang hian COVID-19 hri kai 181 hmuhchhuah an ni a, Mizoram-ah ni khat a hri kai hmuhchhuah zat chu ala tlahniam hlei thei lo a ni.

Inrinni khan ZMC Laboratory-ah Sample 964 enfiah niin heng atang hian hri kai 66 hmuh an ni a, heng zinga 22 te chu Aizawl District-a hri kai hmuhchhuah niin a tam zawk te chu hri kai nen inkawmhnaihna neih avanga inkhunghrang lai an ni a, a dang zawng hi State pawn atanga rawn lut inkhunghrang lai an ni bawk. Lunglei atanga Sample lak te atangin hri kai 44 hmuh an ni bawk a, an vai hian Tlabung leh a chhehvel ami te niin tunhnaia hri kai lo hmuh tawh nen inkawmhnaihna nei an ni.

District hrang hrang TrueNat Laboratory-ah Inrinni khan Sample 192 enfiah niin hri kai mi 11 hmuh an ni bawk a, an zinga 8 te chu Lunglei a hri kai hmuh niin inkhunghrang lai vek an ni a. Champhai, Kolasib leh Khawzawl District-ah hri kai pakhat theuh hmuh an ni bawk.

Rapid Antigen Test hmangin Inrinni khan Mizoram-ah Sample 1309 enfiah niin hri kai mi 104 zet hmuhchhuah leh an ni bawk a, an zinga 81 te chu Aizawl District-a hri kai hmuhchhuah niin an zingah hian hri kaina hriatloh mi 42 zet an awm a ni. Kolasib District-ah hri kai mi 13 hmuh niin an zingah hian hri kaina hriatloh mi 3 an awm a, Serchhip District-ah hri kai mi 7 hmuh an ni bawk a. Lunglei, Siaha leh Champhai District-ah hri kai mi pakhat theuh hmuh niin hri kai tawh nen inkawm-hnaihna neih an ni bawk. Heng bakah hian Zirtawpni khan Mizoram-ah Sample 1661 enfiah niin heng atang hian COVID-19 hri kai 123 hmuh-chhuah an ni bawk.

Nimin khan Mizoram-ah COVID-19 hri kai mi 189 te chu enkawl dam an ni ve leh a, heng hri kai enkawl dam zinga a tam ber, mi 142 te chu Aizawl District-a enkawl te an ni a. Heti hian nimin tlai dar 5:00 thleng khan Mizoram-a hri kai hmuhchhuah chu 8679 niin an zinga 6687 te chu enkawl dam an ni tawh a, hei hi hri kai hmuhchhuah atanga chhutin za zela 77.05 niin tunah hian hri kai enkawllai 1968 an la awm mek a ni.

COVID-19 hri kai zingah nunna chan awm belh :

Mizoram-a COVID-19 hri kai enkawl zingah Inrinni zan khan nunna chan pakhat awm lehin nimin tlai dar 5:00 thleng khan nunna chan mi 24 an awm tawh. Inrinni zan-a COVID-19 hri kai nunna chan hi Lalfakzuala Jongte (24) s/o Thanga Jongte, Bawngkawn South Aizawl niin April 17 khan hri a kai tih hmuhchhuah a ni a, ZMC-ah admit nghal niin April 28 khan ICU-ah dahluh leh a ni a, amahrawh chu Inrinni zan dar 9:15 vel khan COVID-19 Pneumonia vangin a boral zui ta a ni.

Comments

Popular News (Last 30 Days)