Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Champhai NGO in hma la

Champhai District NGO Coordination Committee chuan National Highway No.6 laih mekah mi thenkhat ten harsatna an siam chu pawi an tih thu sawiin, Vawiin Thawhtanni thlenga hmalakna a awm loh chuan a tul anga thenfai hnatlang koh an rel. Thudawn danin National Highway Infrastructures & Development Corporation Limited (NHIDCL) hnuaiah NH. 6, 'Seling to Cham-phai Double Lane' kawngpui laih thar mek chuan Dulte leh Kawlkulh khua a tlawh dawn loh avangin mi thenkhat chuan kawng siamtu NHIDCL Company hnuaia Contractor te bungrua leh khawl thil lakluh tur te an dang a. Hemi chungchang ah hian Zirtawpni tlai khan Khawzawl Police Station-ah Champhai NGO Coordination Committee hian FIR thehlutin Puilo khaw panna peng bula hnathawktute danna tur gate chu May 17, 2021 ralhmaa thiat tur leh kawngpui sialtu te tibuai zawnga khawsa leh hmalatute chhinchhiah sak a, a tul anga hma la turin an ngen a ni.


Mipuite fimkhur turin chah

Medical Operational Team on COVID-19 chuan hripui leng mek chu nikum lam aiin inkai-chhawn a awlsam zawk nia sawiin, mipui te chu fimkhur lehzual turin an ngen a, “Kan fimkhur viau loh chuan nasa takin kan tuar anga, inen-kawlna hmunhma leh hmanrua in min daihlo ang a, Mizo hnam tlemte hi kan pul puk mai ang tih a hlauhawm ta hle a ni,” an ti. MOT chuan tul hle lovah chuan tumah chhuah vah loh tur a nih thu leh thenawm khawveng leh chhungkhat laina pawh tul hle lovah chuan inlen pawh loh tur a ni tih an sawi a. Chhungkaw bil leh thian bila thil tihkhawm pawh insum tur leh, midang nen hlam khat tala inhlat-a awm hram hram turin mipuite an chah bawk.


Containment Zone-ah Tlabung

Lunglei District-a Tlabung VC area chu COVID-19 hri leng mek avangin Containment Zone-ah puan a ni a, Tlabung-ah hian hri kai 148 zet hmuh ni tawhin 24 enkawl dam an ni tawh a, mi 124 enkawl mek an la ni.


Inkharkhipna kalpui zel dawn

Mizoram-a COVID-19 hri leng in ziaawm lam ala pan theih loh avang leh hri kai enkawllai thahnem tak an la awm avangin tukin dar 4:00-a tawp tur Total Lockdown kalpui mek chu tun thla ni 24 zing dar 4:00 thleng khian kalpui leh a ni dawn a, hemi hun chhung hian eizawnna leh tul bik thil ah lo chuan veivah leh inlenpawh phal a ni dawn lova, Thawhlehni leh Zirtawpni-ah te Bazar-na hun siam a ni tawh bawk ang.

Comments

Chhiar Hlawhte