Latest News

Mizoram-ah hri kai 144 hmuh belh leh an ni

Niminpiah khan Mizoram-ah Sample 1961 enfiah niin COVID-19 hri kai mi 144 hmuh belh leh an ni a, ZMC Laboratory erawh tihfai a nih avangin Sample enfiah a awm lo a ni.

Niminpiah khan Mizoram District hrang hranga TrueNat Laboratory-ah Sample 259 enfiah niin hri kai mi 3 hmuhchhuah an ni a, heng hri kai hmuhchhuah te hi Siaha, Kolasib leh Lunglei District-ah mi pakhat theuh an ni. Niminpiah khan District hrang hrangah Rapid Antigen Test hmangin Sample 1702 enfiah leh a ni bawk a, heng atang hian hri kai 141 hmuhchhuah an ni a, an zinga mi 86 te chu Aizawl District-a hri kai hmuhchhuah an ni a, an zinga mi 42 te chu hri kai hmuhchhuah tawh nen inkawmhnaihna nei an ni a, midang 44 te chu hri kaina hriatloh leh chhui zui ngai an ni thung.

Champhai District-ah hri kai mi 32 zet hmuh niin an zinga mi 30 te chu Zokhawthar khua ami te niin hri kaina hriatloh an ni a, midang pahnih hi Bairabi atanga buhfai phur-a kal an ni thung. Kolasib District-ah hri kai 12 hmuh niin Serchhip District-ah hri kai mi 5 hmuh an ni a, Lawngtlai District-a mi 3, Mamit District-ah mi 2 leh Siaha District-ah hri kai pakhat hmuh an ni bawk.

Nimin thleng khan Mizoram-a COVID-19 hri kai hmuhchhuah chu 8176 an tling tawh a, nimin khan hri kai zinga mi 84 te chu enkawl dam leh niin heng te nen hian nimin tlai dar 5:00 thleng khan hri kai 6204 te chu enkawl dam an ni tawh a, hei hi hri kai hmuhchhuah atanga chhutin zaa 765.88 a ni a, tunah hian hri kai enkawllai mi 1949 la awm mekin hri kai zingah nunna chan mi 23 an awm tawh bawk a ni.

Comments

Chhiar Hlawhte