Latest News

Chanchin thar thenkhat :

Buhfai dinhmun a tha

Supply Department hotute chuan Mizoram-a Supply Kudam hrang hrangah buhfai dinhmun a tha tawk tih an sawi. Nimin khan Supply Minister, K. Lalrinliana hovin a Pisa-ah Supply Department Officer-te chuan COVID-19 hripui leng mek kara Mizoram mipuiten buhfai an chan tur ang pangngai taka an hmuh theih nana hmalak dan tur an sawiho a. He hunah hian Supply Department-in nasa taka Monsoon Stock a kalpui vangin tun dinhmunah chuan Mizoram hmun hrang hranga Supply Kudam-ah buhfai a awm tha tawk tih hi tarlan a ni a, tun thla kal lai mek May, 2021 chhunga buhfai sem chhuah tur quota pawh Director, FCS&CA in May 7, 2021 khan allotment tichhuakin, Retailer tin ten an quota theuh a hun taka anlak chhuaha an sem tluan theih chuan COVID-19 hrileng vanga buhfai harsatna tawk an awmlo tura ngaih a ni tih tarlan a ni.


Hri kai-ah Civil mi an tam

Mizoram-a COVID-19 hri kai hmuhchhuah tawh zawng zawng atanga za zela 83.13 zet te chu Civil mi an ni. Integrated Disease Surveillance Programme (IDSP), Directorate of Health and Services in Bulletin an tihchhuah atanga a lan danin nimin thleng khan Mizoram-ah COVID-19 hri kai 8176 hmuhchhuah an ni tawh a, heng zinga 6797 te chu Civilian te niin hei hi hri kai hmuh zawng zawng atangin zaa 94.87 a ni a, Mizo-ram-a COVID-19 hri kai nunna chan tawh mi 23 te chu Civilian vek an ni bawk. Hri kai hmuh tawh zinga 1194 te chu Paramilitary Force mi leh sa an ni a, midang 185 te chu State pawna lirthei khalh te an ni thung a, hri kai enkawllai 1949 zinga 1849 te chu Civil mi an ni bawk a ni.


CMRF-ah sum chhunglut

Mizoram-a Legislator lo ni tawh te intel-khawmna, Former Legislators Association of Mizoram (FLAM) chuan COVIDd-19 hrileng avanga puih ngai te puihna turin nimin khan Chief Minister's Relief Fund for COVID-19 ah Rs. 1,50,000/- an chhunglut.


Admission Fee lak loh phut

PC Party chuan Mizoram Sawrkar-a School Education Department in Covid-19 avanga Zirna In leh Hostel te khar chhunzawm zel tur leh Online hmanga School Admission hawn theih tura ruahmanna a siam chu tha an tih thu thuchhuah siamin an tarlang a. Hetih rual hian Covid-19 hripui leh a kaihhnawihin Mizoram-a chhungkaw tam zawkte kawng hrang hranga harsatna nasa tak min thlen chhoh zel avangin Mizoram Sawrkar, Directorate of School Eduction hnuaia zirna In zawng zawngah Zirlaite Admission Fee lak sak lova a thlawna Zirlaite admission tihsak vek turin Mizo-ram sawrkar chu an ngen bawk.

Comments

Chhiar Hlawhte