Latest News

Chanchin thar thenkhat :

Jail tang te himna sawiho

COVID-19 hri leng mek laka Jail tang te an him theihna tur ngaihtuahin nimin khan Mizo-ram Sawrkar tana High Powered Committee chu an Chairman, Justice Michael Zothankhuma, Judge, Gauhati High Court hovin an thukhawm a. He Committee-in a tum ber chu Jail tang mekte hripuiin a luhchilh lohna tura a tul ang anga hmalak bakah thawktute an himna tura hmalakna pawh a huam tel a ni. Jail tang mekte hripuiin a luhchilha an inkaidarh chum chum tur venna atan Jail hi tun dinhmunah chuan a zangkhai thei ang bera awm tir a ngai a; lut thar turte pawh uluk taka test an nih hnuah a pawng a taka jail-a inthawn liam hi tun dinhmunah chuan thil him ber a ni lo thei a ni. He Committee hi kar hmasa khan an lo thukhawm tawh a, District hrang hranga jail tang mekte thubuai neih dan chi hrang hrang, Jail tan rei tawh chin, Convict tawh leh UTP te list an lo khawnkhawm tawh a ni.


Covid dan bawhchhia hrem

Nimin khan Lunglei-ah District Bawrhsap, Kulothungan A hovin Lunglei District-a Covid-19 Dan bawhchhia Criminal case register tawh te chungchang ngaihtuah a ni a. Covid-19 dona Dan bawhchhiat avang hian Lunglei Police Station-ah thubuai 5 ziahluh ni tawhin chhui zawh a nih hnuah Chargesheet thehluh vek a ni tawh a, Case 3-ah thiamloh chan tir (convict) tawh niin case pahnih hnuaiah dan bawhchhia te sum chawitir niin case pakhat ah hian mi pakhat ni 10 chhung lung In tan tir a ni. Case dang pahnih te hi la rel fel tur (pending trial) an ni thung. 


Ration buhfai khul sak dawn

Aizawl East-II bialtu MLA, Robert Romawia Royte te chhungkua chuan Aizawl East-II bial chhunga mi harsa, Ration Card Eng (AAY) leh Ration Card Hring (PHH) chhungkua zawng zawngte Ration buhfai chu May 2021 atanga kumin December 2021 thleng an khul sak dawn tih puangin, an bial chu hripui vei tamna ber an nih chhoh mek thu a sawi bawk.


Chhingchhip-ah hri kai pung

Serchhip District chhunga Chhingchhip khua ah chuan nimin thleng khan COVID-19 hri kai hmuhbelh an la awm zel a, Chhingchhip atanga thudawn danin nimin tlai thleng khan an khua ah hian hri kai 45 hmuh ni tawhin an zinga mi 6 chu enkawl dam an ni tawh a, tunah hian mi 39 enkawl mek an la ni bawk.


CMRF-ah sum chhunglut

Serchhip West Block MNF, Thenzawl chuan nimin khan Chief Minister's Relief Fund for COVID-19 atan Rs. 30,000/- an chhunglut a, heti hian nimin thlenga CMRF-ah sum lut Rs. 23,35,04,954/- niin Rs. 22,25,10,970/- hman a ni tawh a, tunah hian Rs. 1,09,93,984/- ala awm mek a ni.


BJP Vice President a bang

Mizoram State BJP Vice President, Rev. Dr. LR. Colney chuan BJP atanga banna a thehlut. Rev. Dr. LR Colney hian BJP atanga a banna hi May 18, 2021 khan BJP Mizoram State President, Vanlalhmuaka hnenah a thlen a, Hmarchhak BJP Incharge leh Central atanga Mizoram viltu bakah BJP North East Co-ordinator te hnenah a thawn tel nghal a ni. BJP atanga banna a thehluh chhan sawiin Rev. Dr. LR .Colney chuan, “Party chhungah thawhhona a tha lo a, hruaitute inrawn-khawm emaw, thil sawiho emaw, thil pawimawh inhriattir emaw a awm ngai tak loh avangin ka pawimawhna vak hi ka hre ta lo a. Ka mimal-ah hi chuan inthliarfihlim hi a finthlak maiin hriatna ka nei a, chuvangin thutlukna siamin ka inthiar-fihlim a ni mai,” a ti a ni.

Comments

Popular News (Last 30 Days)