Mizoram-ah COVID-19 hri kai hmuh belh zel an ni

Mizoram-a COVID-19 hri kai hmuhchhuah chu 7551 an tling ta a, Inrinni-a Sample enfiah atangin Mizoram-ah COVID-19 hri kai 169 zet hmuhchhuah leh an ni.

Inrinni khan Mizoram-ah Sample 2667 enfiah niin heng atang hian hri kai 169 hi hmuh an ni a, ZMC Laboratory-ah Sample 882 enfiah niin heng atang hian hri kai 52 hmuh an ni a, an vai hian Aizawl District mi vek niin hri kai tawh nen inkawmhnaihna nei leh tunhnaia State pawn atanga rawn lut, inkhunghrang lai te an ni hlawm a ni.

Inrinni khan District hrang hranga TrueNat Laboratory-ah Sample 233 enfiah niin heng atang hian hri kai mi 21 hmuh an ni bawk a, an zinga mi 8 te chu Khawzawl District atanga Sample lak niin 2nd IR Batallion mi leh sa, tunhnaia State pawn atanga rawn haw te an ni a, Lunglei District-ah hri kai mi 5 hmuh niin Saitual District-ah mi 4, Serchhip District-ah mi 2 leh Kolasib leh Saiha District-ah mi pakhat ve ve an ni bawk.

Rapid Antigen Test hmangin Inrinni khan Mizoram-ah Sample 1552 enfiah niin heng atang hian hri kai 96 hmuhchhuah an ni a, an zinga mi 53 te chu Aizawl District-a hri kai hmuhchhuah niin Lengpui Airport Screening Point-ah hri kai mi 10 hmuh an ni a, midang 43 te chu Aizawl District chhung hmun hrang hrang ami te niin an zinga mi 38 te chu hri kaina hriatloh leh chhuizui ngai te an ni a, midang te hi hri kai hmuh tawh nen inkawmhnaihna nei an ni. Heng bakah hian Kolasib District leh Siaha District-ah hri kai mi 11 ve ve hmuhchhuah an ni a, Saitual District leh Lunglei Distrct-ah hri kai mi 6 ve ve hmuh niin Serchhip District-ah hri kai mi 5 hmuh an ni a, Mamit District-ah hri kai mi 4 hmuh an ni bawk.

Nimin khan Mizoram-ah COVID-19 hri kai mi 172 te chu enkawl dam an ni ve leh thung a, heti hian nimin tlai dar 5:00 thleng khan Mizo-ram-a hri kai hmuhchhuah chu 7550 niin an zinga 5755 te chu enkawl dam an ni tawh a, hei hi hri kai hmuhchhuah atangin zaa 76.22 niin hri kai enkawllai 1775 an la awm mek a ni.

Mizoram-ah ni khat-ah hri kai 3 an boral :

Mizoram-a COVID-19 hri kai mi 3 te chu nimin khan boralin Mizoram-ah ni khat-a hri kai boral an tam ber ni a ni. April 22, 2021-a hri kai hmuhchhuah Bawihluta (82), Thakthing Veng chu nimin chhun dar 1:00 khan State Referral Hospital, ZMC-ah a boral a, nimin chawhnu dar 3:50 khan Lalneihliana (87), Bethlehem Vengthlang chu boral lehin ani hi April 29-a hri kai hmuhchhuah a ni a, nizan dar 6:30 khan Lallung-hnema (86), North Lungpher chu a boral ve leh bawk a, ani hi May 3-a hri kai hmuhchhuah a ni thung. Heti hian Mizoram-ah COVID-19 hri kai boral mi 20 an tling ta a ni.