Chanchin thar thenkhat :

Gas pechhuak dawn rihlo

Mizoram puma LPG Distributors’ Association chuan Vawiin, Thawhtanni atang hian eirawngbawlna Gas hralh chhuahna bakah mipui hnena eirawngbawlna gas pekchhuah chu tihtawp rih an tum. Mizoram LPG Distributors’ Association hruaitute chuan tunlai hrileng darh chak dan leh Second Wave mipui-a a thawh dan thlirin, Gas semchhuah leh Office Showroom hawn chu hnathawk te tan a him ta lo nia an hriat thu an sawi a. Mizoram puma LPG service a thawkte chu COVID-19 hri danna la lo an nih avangin leh Assam atanga LPG rawn phurluttute hi endikna paltlanglo a rawn chho te an nih avangin a him loh mai bakah, mipui a COVID-19 hri thehdarhtu nih theihna a sân tak em a avangin eirawng-bawlna Gas hralhchhuahna khar leh mipui hnena sem chu an chawlhsan ta tih an sawi. 

Bialtu MLA in Ambulance hlan

Supply Minister leh bialtu MLA, K. Lalrinliana chuan Inrinni zing khan MLA Local Area Development Scheme hmanga lei, Ambulance chu Bairabi PHC-a thawktute hnenah a hlan a, Bairabi mipuite hriselna an enkawlna kawngah Ambulance chu tangkai taka an hman anih theih nan Minister chuan duhsakna a hlan bawk. Ambulance hi MLA-LADS hmangin May ni 5, 2021 khan Rs. 5,77,190/- sengin GIG Motors Aizawl atangin lei a ni a, Registration tihna atan Rs. 8810/- dah a ni bawk a ni.

Health Minister in tlawh

Health Minister Dr. R. Lalthangliana chuan Inrinni khan Lengpui-a Community Covid Care Centre (CCCC) atana hman, Govt. M/S-I chu tlawhin CCCC mamawh chi hrang hrang PPE kit, Hand Sanitiser, Face Mask bakah Apple leh Grape te a pe a, Oxgygen Concentrator leh dam-dawi thahnem tak bakah sumfai a hlan bawk. Health Minister chuan Mizoram puma hri leng dona a thawktute inpekna chu ropui a tih thu sawiin, an tan bang lova tawngtai tul a tih thu a sawi bawk.

Vbc. 7-8 vel a tlin beisei

Mizoram sawrkar hnathawk ten COVID-19 dona atan ni khat hlawh an thawhkhawm chu cheng vbc. 7 - 8 inkar vel tling tura ngaih a ni. Federation of Mizoram Government Employees & Workers hruaitute chuan sawrkar hnathawkte hlawh thawh tur chungchang hi an sawiho tawh a, Finance Department-in an chhut thuak dan chuan ni khat hlawh tlingkhawm hi cheng vbc. 7-8 inkar vel a ni dawn a. Hlawh thawh tur hi May thla hlawh atanga pe (cut) turin ruahmanna siam niin tling-khawm zat chu June thla tirah a hriat an beisei a ni.

RIPANS in hri do hna thawk

Mizoram sawrkar ngenna angin RIPANS-a zirlai 70 vel chuan lawmman phut lovin CO-VID-19 dona ah sawrkar an pui mek a, kar kalta atang khan RIPANS Final Year zirlai 70 vel chuan sawrkar hi puiin, B.Sc Nursing leh Master of Pharmacy zirlai ten hri danna pekchhuah kawngah an pui a, Medical Laboratory Technician ten sample lakkhawm puiin, RIPANS Faculty atangin doctor te chu CCC vil turin an inbuatsaih chho tan a, anni hian Counselling leh damlo enkawl kawngah te an pui dawn a ni.