Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Mizoram-ah chuan mipui zawng zawng tangrualin COVID-19 hripui kan do - Health Minister

Health Minister Dr. R. Lalthangliana chuan Mizoram-ah chuan mipui zawng zawng tangrualin COVID-19 hripui chu a huhovin theihtawp chhuahin an do tlang tih a sawi a. Tunhnaia COVID-19 hri kai hmuhchhuah punna chhan chu sample test a tam vang a ni tih a sawi bawk.

Nimin khan Union Health Minister Dr. Harsh Vardhan hovin India hmarchhak State 8 leh West Bengal Health Minister te chuan Video Conferencing hmangin COVID-19 hripui leng mek dona kawnga hmalakna leh a kaihhnawih chi hrang hrang an sawiho a, he hunah hian Mizoram Health Minister chuan he thu hi sawiin, Sakhaw hruaitute, NGO hrang hrangte nen tangrualin COVID-19 positive te enkawlna tur, Community COVID Care Centre (CCCC) hmun hrang hrangah din anih thu a sawi a. Hei hian sawrkar ruahman sa DCH, DCHC leh CCC te nasa takin a chhawk zangkhai a, CCCC te hian Kohhran leh khawtlang leh sawrkar tangrualin mumal tak leh felfai takin hma an la a ni, a ti.

Mizoram sawrkarin Mizoram State Health Care Scheme a ruahman thu pawh Health Minister chuan sawiin, he Scheme hnuaia inziaklut te zingah COVID-19 hri kai an awm chuan he Scheme hnuaiah hian an inenkawlna senso cheng nuai 2 thleng an bill thei tih a sawi a, sawrkar laipuiin COVID-19 positive enkawlna tur a ruahman sa DCH, DCHC leh CCC bakah COVID-19 second wave Mizoram-a a rawn thawh tan tirh atanga ruahmanna an siam zingah sawrkar leh khawtlang tangrualin an siam CCCC a inenkawlte pawhin an inenkawlna senso hi an bill theih thu Health Minister hian a sawi a ni.

COVID-19 hripui leng dona kawnga Mizoram sawrkar hmalakna a tarlan zingah India hmarchhak State zingah sample test kawnga hma la tha ber dawttu kan nih thu leh tunhnaia positive hmuhchhuah pun nachhan chu sample test a tam vang a ni tih sawiin, hei hian hripuin darh chak tur chhutchah kawngah awmzia a neih ngei a beisei thu pawh a sawi a. Hri kai hmuhchhuah tam mahse he hripui vanga nunna chan chu Mizoram-ah mi 30 an ni tih sawiin, theihtawp kan chhuah chungin kan theih chin piah lam thil avanga nunna kan chhan thei lo hi Mizoram mipui zawng zawng rilru a na a ni, tiin nunna chan hi positive hmuhchhuah atanga chhutin 0.32% a ni tih a sawi bawk.

Health Minister chuan hripui leng vanga Lockdown kalpui a tul mek lai pawh hian khaw-pui a chengte an harsat hlau in thingtlang khua ami ten an thlai thar chi hrang hrang a thlawnin khawpuia harsatna tawkte an pe tih pawh a sawi a, khawpui chhungah pawh harsatna tawk te chu kohhran leh khawtlang hruaitute nen tangrualin chhawmdawlna an ngaihtuahsak thin a, he Mizo-ram mipuite tanrualna leh inhmangaihna hi hripui dona kawngah kan tha tichaktu a ni, a ti.

Hei bakah hian kum 18-44 te hnenah hri danna pek mek an nih thu pawh Health Minister chuan sawiin, sawrkar laipui atanga vaccine 16,000 an hmuh atangin ngaih pawimawh hmasak bik (priority group) an siamte pek mek an nih thu a sawi a. Kum 45 chunglam vaccine pek kawngah pawh a titha ber State pathum zingah kan tel thu sawiin, vaccine pek ngai hi tlemte an ni tawh thu leh hei hi a rang lama rawn ngaihtuahsak turin Union Health Minister hi a ngen a ni.

Health Minister chuan India ram State hrang hrangah Mizote kan inzarpharh ve tawh tih sawiin, kan naute leh kan fate Mizoram pawna chhan hrang hrang vanga awm an tamin COVID-19 hripui vanga harsatna tawk leh nunna chan an awm nual tawh tih a sawi a. State hrang hranga Health Minister-te hnenah an State a Mizo harsatna tawkte an awma lo ngaihsak tur leh lo tanpui tura ngenna lehkha a thawn thu a sawi bawk.

Comments

Chhiar Hlawhte