Latest News

Thingtlang mipuite harsatna chhawk zangkhai turin ni 100 inhlawhna pekchhuah tan a ni

Rural Development Minister, Lalruatkima chuan Hripui leng karah thingtlang mipuite harsatna chhawk zangkhai turin ni 100 inhlawhna nuai 4600 pekchhuah tan a nih thu a sawi.

Rural Development Minister, Lalruatkima chuan COVID-19 hripuilengin Mizoram min tihbuai mek karah mipuite, a bik takin thingtlang lam ami ten harsatna an tawhte chhawk zangkhai a nih theih nan Rural Development Department-in theihtawpin hma an la tih sawiin, kum 2021-22 chhunga MGNREGS hnuaia inhlawhna tura Ministry of Rural Development, Govt. of India-in thla kalta a cheng nuai 7788.34 a rawn sanction chu beneficiary ten an chhawr tangkai theih nan chak taka an bawhzui thu leh April thla chhunga ni 100 inhlawhna sum cheng nuai 4600 chu nimin atang khan beneficiary-te account-ah thunluh anih thu sawi a ni.

MGNREGS hnuaia April, 2021 hnathawhna sum Job Card Holder te account-a beisei aia a lut har chu pawi a tihthu sawiin RD Minister chuan, SC leh ST Category te inhlawhna tur sum hi April ni 30, 2021 a sanction an nih thu leh Others Category pual hi April 26, 2021 a sanction a ni thung tih a sawi a. Others (General) Category hnuaia inhlawhte tana an inhlawhna pawisa chu Job Card Holder te account-ah a luh tawh laiin, ST leh SC Category hnuaia inhlawhna pawisa te chu Rural Development Ministry leh Bank lam inkarah technical lama buaina leh harsatna a awm avang leh Central Ministry lamah COVID-19 hripuileng avanga Office kal a mumal theih loh avangin Job Card Holder te Account ah lut thei lawk lo a ni, a ti a. He buaina chingfel tur hian a tul anga hma an lak char char thu sawiin, May ni 18, 2021 khan ST leh SC Category te hlawh hi State Nodal Account-ah lutin, pawia a luh veleh hmalak nghal char char niin Vawiin emaw, naktuk-ah emaw chuan Job Card holder te account-ah an inhlawhna pawisa hi lut kim hman vek tura beisei a ni, a ti a. Inhlawhna pawisa tlema a khawtlai hret chungchangah Job Card Holder hriatthiamna Minister hian a ngen a ni.

Rural Development Minister chuan kumin atang hian Job Card Holder pakhatin nikhat ah Rs. 233/- zel an hlawh tawh dawn tih sawiin, kum kalta 2020-21 chhunga inhlawhna Rs. 225/- aiin Rs. 8 in a tam zawk nghe nghe a ni, a ti a. Mizoram chhunga District hrang hrangte kumin April, May leh June thla chhunga an inhlawh dan tura ruahmanna siamdan tlangpui pawh sawiin, Serchhip District tan April-ah ni 5, May-ah ni 14 leh June-ah ni 14 a nih thu a sawi a. Mizoram pumah chawhruala lakin April thla-ah ni 11, May thla-ah ni 12 leh June thlaah ni10 inhlawh turin ruahmanna siam a ni, a ti bawk.

Comments

Chhiar Hlawhte