Mid-Day Meal kalpuina tura mamawh te pawm

Naupang te hnena Chawchhun (Mid-day Meal) pek chungchanga India rama thuneitu sang, Programme Approval Board thutkhawm chu niminpiah khan neih niin Mizoram atang pawhin sawrkar hotute an tel a ni.

He thutkhawm hi Ministry of Education-a Secretary, Anita Karwal chuan kaihruaiin Mizoram atangin School Education Department-a Special Secretary, Dr. Lalzirmawia Chhangte leh School Education Director, James Lalrinchhana bakah Officer dangte an tel a. He meeting-ah hian kum 2021-2022 chhunga sum mamawh tur leh Buhfai mamawh zat turte chhawpchhuah niin Sawrkar enkawl School-a inziaklut Primary School naupang 91,859 leh Middle School naupang 41,949 naupangte chuan kum 2021-2022 chhungin a thlawnin Mid-Day Meal an dawng leh thei dawn a ni. Sum mamawh chhawpchhuah cheng nuai 2161.37 chu pawm a ni a, Buhfai quintal 32,215 pawh naupangte Chawchhun atan pawm a ni bawk.

Kum 2021-22 atang hian Mamit District huamchhungah buhfai tha mi (Fortified Rice) chu Sawrkar School-a inziaklut naupangte hnenah Mid-Day Meal Scheme kaltlanga sem a ni dawn a, reilote-ah hei hi a taka kalpui tum a ni bawk.