Bazar-a thil man bithliahtu tur Committee din dawn

COVID-19 hripui len chhunga Aizawl Bazar hrang hranga Sa, chawhmeh leh thei man bithliah tur Committee din a ni dawn.

Nimin khan Commerce & Industries Minister Dr. R. Lalthangliana hovin a Pisa-ah COVID-19 hripui leng vanga sa leh thlai man to lutuk khuahkhirh dan tur sawiho a ni a, he hunahh hian Minister chuan tunlai lockdown vuakveta dawr hawn leh bazar-a thlai leh theirah bakah sa zawrh dan tur a ruahmanna siam chu a tirah buaina tawk deuh mahse a hnuah chuan a felfai tha nia a hriat thu a sawi a, mipuite pawhin sawrkar inkaihhruaina an zawm tha sawt hle tih Bazar boruak atangin a hriat thu leh lawmawm a tih thu a sawi a, Thlai thar leh theirah bakah sa man to lutuk chungchang ah mipui zawng zawng dawl zawh tawka ruahmanna siam a tul thu a sawi bawk a ni.

He thutkhawm a tel te hian kar hmasa lama Sa, chawhmeh leh theirah man bazar-a kalpui a nih dan an thlirho hnuah leh Local Task Force te leh Police te report ngaihthlak a nih hnuin COVID-19 hripui len chhunga Sa, chawhmeh leh thei man bithliah tur Committee din an rel a. He Committee hi Aizawl District Bawrhsap kaihhruaina hnuaiah din tur niin, Sa, chawhmeh leh theirah bazar-a hralhna man tur an bithliah ang a, a tul dan azirin hei hi an ennawn fo dawn a ni. Hei bakah hian heng thil hralhna man bithliah zawm lote hremna tur pawh ruahman a ni ang.