Chanchin thar thenkhat :

Ramkang sawihona nei

Tunhnaia Lawngtlai District chhung hmun engemaw zat-a kangmei chhuak chungchangah nimin khan State Level Special Investigation Team leh Lawngtlai District Forest Fire Prevention Task Force te chuan Video Conferencing hmangin inkawmna an nei a, he hunah hian kang-mei chhuah thulha rang zawka chet lak a nih theih nana hmalak a tul dan leh mipui hnena zirtirna kalpui dan tur te, kangmei thelh tura thlanchhuah te training pek dan tur te, kangmei chhuah thulha rang taka mipuiin report an thehluh theih dan tur te, hemi chungchanga technology hman tangkai theih dan te leh tlawmngai pawlte leh khawtlang hruaitute leh mipuite nena thawhhona tha chhawm-nun a hmalak tlan zel dan turte sawiho a ni.

ZMC Staff-ah hri kai awm leh

Zoram Medical College (ZMC) COVID-19 Laboratory (VRDL) a thawktu pakhat chuan COVID-19 hri a kai tih hmuhchhuah a nih avangin nimin chhun lamah ZMC Laboratory-ah hian sample enfiah hna thawh theih a ni lova, nizan lam khan thawh chhunzawm leh theih beisei a ni. May 7 atanga May 11 inkarah khan VRDL Staff te zingah COVID-19 positive 3 an awm avangin May ni 12 atang khan Laboratory hi khar a lo ni tawh a, Staff pawh mi 19 lai khung-hran nghal niin an aiawh tur hian back-up Team te chuan May ni 13 atang khan sample test hna hi an thawk chhunzawm nghal a, amaherawh chu Back-up Team zingah hian hri kai hmuh an awm ve leh avangin nimin atang khan an vaiin khunghran an ni ve leh ta a ni.

CMRF-ah sum chhunglut

Mizoram-a MLA 7 te chuan COVID-19 hri leng mek laka mipui an him theih nan leh a tul apianga hman turin nimin khan an hlawh atangin Rs. 15,000/- theuh, a vaiin Rs. 105,000/- chu Chief Minister Relief Fund for COVID-19 ah an thawh a, heng bakah hian Wesleyan Methodist Church, Aizawl leh MNF Sub-Hqrs. Lung-lei bakah mimal ten pawisa hi an thawh bawk.

Tanpuina sem dan tur rel

Chief Minister’s Relief Fund for Covid-19 atanga Hnahthial District-in Rs.2,50,000 a dawn hman dan tur chu nimin khan Hnahthial District Bawrhsap hovin sawihona neih a ni a, CM Relief Fund sum dawn hi khawpui chhung YMA Branch 8-ah cheng nuai khat vel semchhuah phawt nise, Branch YMA ten tanpui turte lo thlang se an ti a, a pawisafai in emaw, eitur in emaw pek mai nise an ti bawk.