Latest News

Kum 18-44 te Vaccine pek mek niin Vawiin ah Frontline Worker te Vaccine pek leh an ni dawn

Serchhip District-ah kum 18 leh 44 inkar ngaih pawimawh hmasak te COVID-19 Vaccine pek leh an ni a, Vawiin-ah Serchhip Town chhunga VLTF Fronline Worker te hri danna pek leh an ni bawk ang.

Sawrkar ruahmanna a Serchhip District chhunga kum 18 leh 44 inkar zingah ngaih pawimawh hmasak te tana COVID-19 hri danna kalpui mek hi nimin khan Thenzawl leh Chhiahtlang-ah te chhunzawm a ni a, Thenzawl-ah hian mi 98 te hri danna pek niin Chhiahtlang-ah mi 41 pek an ni a, nimin-a kum 18 chunglam zinga hri danna pek hi an vaiin 139 an ni a, ni thum chhungin kum 18 leh 44 inkar mi 416 te hri danna pek an ni hman a ni.

Vawiin hian Serchhip Town chhung VLTF hrang hranga Fronline Worker te chu COVID-19 Vaccine pek an ni dawn bawk a, ruahman lawk ang chuan Vaccine pekna hi Serchhip Main Centre leh Kawnpui VC Hall-ah neih a ni anga, Main Centre-ah hian chawhma dar 10:00-ah Field Veng VLTF leh New Serchhip North leh South VLTF te hri danna pe in chawhma dar 11:00-ah Dinthar leh Darnam VLTF te pek an ni anga, chhun dar 12:00-ah Chhim Veng VLTF leh Vengchung VLTF te pe in chawhnu dar 1:00-ah Chanmari VLTF te pek an ni ang.

Kawnpui VC Hall-ah chawhma dar 10:00-ah Executive Duty te pe in chawhma dar 11:00-ah P&E Veng leh Hmar Veng VLTF te pek an ni anga, chhun dar 12:00 atangin Kawnpui leh Kawnpui North VLTF te vaccine pek an ni bawk ang. Hei bakah hian kum 45 chunglam te tan chuan hri danna hi lak theih reng a ni dawn bawk.

Nimin thleng khan Serchhip District-ah mi 15,574 te chu Vaccine Dose 1-na pek an ni tawh a, an zinga 4268 te chuan Dose 2-na an la tawh bawk a. Serchhip District-ah hian Healthcare Workers mi 733 te chu Vaccine Dose 1-na pe tawhin an zinga 711 te chuan Dose 2-na an la tawh a. Frontline Workers mi 2520 te chuan Dose 1-na la tawhin an zinga 1742 te chuan Dose 2-na an la tawh a. Kum 45 atanga 60 zingah mi 6778 ten Dose 1-na la tawhin an zinga 467 te chuan Dose 2-na an la tawh bawk a. Kum 60 chunglam mi 5127 ten Dose 1-na la tawhin an zinga 1348 ten Dose 2-na an lak bakah kum 18 leh 45 inkar mi 416 ten Dose 1-na an la tawh a ni.

Mizoram pumah nimin thleng khan mi 2,44,547 te chu COVID-19 Vaccine Dose 1-na pek ni tawhin an zinga 51,956 te chu Dose 2-na pek an ni tawh bawk a. Healthcare Workers mi 14,882 te chu Dose 1-na pek ni tawhin an zinga 11,386 te chuan Dose 2-na an la tawh bawk a. Frontline Workers mi 30,516 te chu Dose 1-na pek ni tawhin an zinga 17,648 te chuan Dose 2-na an la tawh a. Kum 45-60 inkar mi 1,31,778 ten Dose 1-na lain an zinga 4632 te Dose 2-na pek an ni tawh a, kum 60 chunglam mi 57,895 te Dose 1-na pein an zinga mi 18,290 te chu Dose 2-na pek an ni tawh bawk a, kum 18-45 inkar mi 9476 te Dose 1-na pek an ni tawh bawk a ni.

Comments

Chhiar Hlawhte