Latest News

ASF vangin Serchhip Dist. ah Vawk 68 thi tawhin khawtlang hruaitute nen hmalak a ni

Serchhip District-a Vawk hri leng mek, African Swine Fever avangin nimin thleng khan Serchhip District-ah Vawk 68 a thi tawh a. Serchhip-a AH&Vety Department hotute chuan Vawk hri lenna hmuna puan tawh ah Vawk dang an thih zel lohna tur leh Vawk thi sawngbawlna kawnga khawtlang hruaitute hmalakna chu lawmawm an tih thu an sawi.


Serchhip-a AH&Vety Department hotute hnen atanga thu kan dawn danin darkar 24 kalta chhung khan Serchhip District-a ASF vanga Vawk thi 2 awm lehin heng te hi New Serchhip ami, Vawk puitling ve ve a ni a, heti hian Department chhinchhiah danin New Serchhip-ah hian Vawk thi 21 a awm tawh a ni. Serchhip District-a ASF hri lenna hmunah hian Vawk thi 68 zet a awm tawh nia chhinchhiah a ni a, heng zinga 25 te hi East Lungdar ami niin New Serchhip-ah 21 a thi tawh a, Keitum-ah Vawk 9 thiin Thenzawl leh Chhiahtlang-ah 6 ve ve leh Vanchengte-ah Vawk pakhat a thi tawh bawk a ni. Darkar 24 kalta chhung khan Serchhip DVO huamchhungah chhan hriatloh a Vawk thi 2 awm lehin heng te hi Thingsai, Hnahthial District ami a ni a, Serchhip DVO hnuaia chhan hriatloh a Vawk thi pawh 19 a tling ta bawk a ni.

Serchhip-a AH&Vety Department hotute chuan Vawk hri lenna hmuna puan tawh ah Vak dang an thih zel lohna tur leh Vawk thi sawng-bawlna kawnga khawtlang hruaitute hmalakna chu lawmawm an tih thu an sawi a. Serchhip DVO, Dr. R. Lalmakthanga chuan sawrkar in Serchhip District-a Vawk hri lenna hmuna a rawn puan tawh khaw 6-ah te hian khawtlang hruaitute nen theihtawp chhuaha hma an lak zui thu sawiin, Keitum khua ah leh New Serchhip South VC huamchhung ah te chuan Vawk hri leng a zual zel lohna tura Vawk thi te phumna tur pawh Thlanmual hran buatsaih a nih thu leh damdawi te pawh a tul anga ngaihtuahin hma an lak thu a sawi a. Heng bakah hian khawtlang hruaitute leh Department hmalakna in hri leng laka ran an him theihna turin kawng hrang hrangah mipui inzirtirna te pawh an buatsaih thu a sawi bawk.

New Serchhip South VC Secretary, Ram-dinmawia Ralte chuan an huamchhunga Vawk natna, ASF a len avang hian Vawk thi phumna atan Khawtetlang-ah Vawk Thlanmual an siam thu leh hetah hian Vawk thi phumna tur 12 chu JCB hmanga an laih tawh thu sawiin, tunah hian Vawk pahnih an phum tawh thu a sawi a. An huam-chhunga Vawk la dam te hri laka an him theihna turin VC te pawhin Bleaching te leiin a mamawh apiangte an sem thu leh tunah hian Vawk reng reng talh phal a nih tawhloh thu a sawi a. An hmalakna te hi khawtlang mipuite pawhin an zawm that thu leh Dan zawmlo te chungah chuan a tul angin hmalak zel a nih dawn thu a sawi bawk.

New Serchhip South VC huamchhungah hian April 7 atanga nimin thleng khan chhungkaw 21 te Vawk 33 thi tawhin heng te hi a puitling 24 leh Vawk note 9 a ni a, hri vanga Vawk chan tam ber FX. Laltanpuia chuan Vawk pui pakhat leh a note 6, a vaiin Vawk 7 a chan tawh a, Vawk 4 chan tawh te pawh an awm bawk a ni.

New Serchhip VC te chuan Vawk thi zat Department lam chhinchhiah leh anmahni chhin-chhiah a inmilloh chhan chu Department-a report lo, VC hmalakna kalpui a nih hnua report leh an awm vang tih an sawi bawk.

Comments

Chhiar Hlawhte