Latest News

Kolasib District-ah COVID-19 hri leng dona atana hman turin Motor 4 inhlan a ni

Kolasib bialtu MLA leh Supply Minister, K. Lalrinliana chuan a bial chhung khaw pahnih-a COVID-19 hri leng kaihhnawiha a tul anga hman tur Motor ruahman sakin nimin khan a hlan a, Serlui bialtu MLA pawhin nimin vek khan Bilkhawthlir PHC-ah Ambulance a hlan bawk.

Supply Minister K. Lalrinliana hian a bialchhunga COVID-19 hri leng mek kaihhnawiha a tul apianga an hman atan Sumo chu nimin khan Kolasib Joint VC leh Bairabi Joint VC te hnenah a hlan a, Sumo hi Bialtu MLA aiawhin MNF Kolasib Block President, Lalzawmmawia'n Kolasib Town Joint VC Vice Chairman, C. Rothuamluaia leh Bairabi Joint VC Chairman, R. Lalfakawma hnenah Chabi pein a hlan a ni. Heng Sumo te hi pakhat Kolasib tan leh pakhat zawk chu Bairabi lam tan a ruahman a ni a, Diesel man atan Rs. 10,000/- ve ve hlan an nih bakah Driver hlawh tur pawh Kolasib bialtu MLA hian a tum vek dawn a ni. Heng Sumo te hi COVD-19 hri lenzual laia a bialchhung mipui ten tangkai taka an hman a beisei thu bialtu MLA chuan a sawi bawk.

Serlui bialtu MLA, Lalrinsanga Ralte pawhin nimin khan COVID-19 hrileng dona kawnga a bial chhung Bilkhawthlir Primary Health Centre-a thawktute thuam chak nan MLA Local Area Development Scheme hmanga Ambulance a ruahman sak chu a hlan a. Covid-19 hrileng dona kawnga damlo phurh kual ngaite, ramri hnaih-a Screening Point-a Covid-19 kai hmuhchhuah te Covid Care Centre-a phurh chhoh nan te bakah khawtlang hriselna kawnga hnathawh nan MLA-LADS hmangin Ambulance chu ruahman a nih thu a sawi bawk.

Hetihlai hian nimin vek khan Kolasib Diakkawn-a cheng CT. Mawia (CZS) te chuan hrileng dona atana a tul apiang a hman turin Kolasib DC hnenah Maruti Suzuki Eeco Van an pe bawk a, he Motor hi Kolasib DC, Dr. H. Lalthlangliana chuan a dawng a ni. He hunah hian Kolasib DC chuan hri dona kawnga lirthei mamawhna a nasat lai taka mi inphalte atanga lirthei ruahman a ni chu lawmawm a tih thu a sawi a, Kolasib District-in hri dona kawng a hma a lakna ah tangkai tak a hman a nih tur thu a sawi bawk. Motor hlantute pawhin hripui leng sutkianna kawnga tha an thawh theihna tura Pathian malsawmna an dawng chu an lawm hle tih an sawi bawk.

Comments

Chhiar Hlawhte