Gas sem loh vangin mipui chi-ai lo turin ngen

Mizoram puma eirawngbawlna Gas hralhchhuah tihtawp chungchangah Mizoram sawrkar chuan mipui chi-ai lo turin an ngen.

    Mizoram puma LPG Distributors’ Association chuan tunlai hrileng darh chak dan leh Second wave mipui-a a thawh dan thlirin, Gas semchhuah leh Office Showroom hawn chu hnathawkte tan a him ta lo nia an hriat avangin nimin atang khan Mizoram pumah eirawngbawlna Gas hralhchhuah an titawp a. Hemi chungchangah hian Mizoram sawrkar chuan mipui chi-ai lo tura ngenin, eirawngbawlna Gas pechhuaktute COVID-19 hri danna vaccine pek an la nih loh avanga hetianga hma la an nih ber avangin Supply Department chuan eirawngbawlna Gas pechhuaktute tana COVID-19 vaccine lak dilsakna lehkha chu Health Department hnenah an thehlut nghal tih an sawi a ni. Supply Department atanga thudawn danin LPG Distributors’ Association te tana vaccine lak an dilpui chu a hlawhtlin ngei an beisei a, LPG Distributors’ Association hruaitute hi Supply Minister nen pawh an inkawm tawh a ni.