Health Department in India ram-a COVID-19 Vaccine pek dan an sawifiah

Mizoram sawrkar-a Health Department chuan COVID-19 Vaccine pek hna thawh mek chungchang chu thuchhuah siamin a sawifiah.

COVID-19 Vaccine chungchanga thuchhuah ah hian COVID-19 vaccine hi India ram pumah January ni 16, 2021-a pek tan a nih rual khan Mizoram-ah pawh pek ve nghal a nih thu tarlangin, tun dinhmunah hian Central sawrkar ruahman dan angin Healthcare Workers, Frontline Workers bakah kum 45 leh a chunglam-te hnenah vaccine hi ngawrh taka pek mek zel a ni tih an tarlang a. Central sawrkar chuan COVID-19 vaccine pek chungchanga thuneihna sang ber neitu ‘National Expert Group on Administration of Covid-19 vaccine’ (NEGVAC) chu dinin NEGVAC hian COVID -19 vaccine pek dan tur leh pek hmasak turte relin, a hnuaia Priority Group-te (ngaih pawimawh/pek hmasak tur) a rawn ruahman te chu tunah hian pek mek an nih thu an tarlang a. Healthcare Workers (damlo enkawltute) chu a hmasa ber an nih thu leh Frontline Workers te chu pahnihna an nih thu an tarlang a. Frontline Workers-ah hian sipai, Ministry of Housing & Urban Affairs leh State sawrkar hnuaia ngaih pawimawh te tarlangin, a dawt-ah khua leh tui, kum 45 chunglam te an nih thu a tarlang bawk.

NEGVAC in Frontline Workers-a a telh te hi State sawrkarin a lo belh emaw, a lo tih danglam emaw thiang lo nia tarlangin, heng Healthcare Worker, Frontline Worker, kum 45 chunglam sawrkarin pek tur a tihte chauh vaccine pek theih an nih avangin pawl leh mimal vaccine pek tura diltute chu kum 45 an la tlin loh chuan pek theih an ni lo tih an tarlang a. Hemi chungchangah hian central sawrkar chu a khauh thu leh Frontline worker leh Healthcare worker te phei chu vaccinate (chiu) an nih hmain Certificate mumal tak an neih vek a ngai tih an tarlang bawk.

Tunah hian kum 18-44 inkar chu Central Sawrkar chuan hri danna pek theih tur zingah a rawn belh leh tih pawh sawrkar thuchhuah chuan tarlangin, hemi atana vaccine hi a rawn thlen hunah LPG phurtute leh mipui hnena semtute, Petrol pump-a hnathawk te, Bawnghnute sem, Print & Electronic media-a thawkte leh chanchinbu semtute, PHE Department-a Tui sem te, Power Supply enkawltute, damdawi dawr nghak te, Bank-a thawk te, Airport-a thawh te, Public Transport-a Driver leh Conductor, Post Office-a thawk leh Govt. Fair Price shop/ration semtute te chu pek hmasak leh tur an nih thu an tarlang bawk.