Mizoram-ah Oxygen Concentrator indaihlohna avanga harsatna thleng lo tura ngaih a ni

Nimin khan Mizoram sawrkar chuan Switzerland atangin Oxygen Concentrator a dawng a. Tun dinhmunah Mizoram in Oxygen Concentrator indaihlohna avanga harsatna thleng lo tura ngaih niin Mizoram sawrkar chuan Oxygen Plant din turin hma a lak mek thu Health Minister chuan a sawi bawk.

Health Minister Dr. R. Lalthangliana chuan thuthar thehdarhtute zawhna chhangin sawrkar laipui-a Health Ministry kaltlangin Switzerland atangin Oxygen Concentrator 100 leh Adaptor bakah Hnar-a vuah tur bungrua thlengin engemaw zat an dawn thu a sawi a. Heng Oxygen Concentrator dawn thar te hi CCC, CCCC leh ZMC bakah mamawhna zawnah hman mai theih tura semchhuah a nih tur thu a sawi a. Foreign atanga lo lut hi sawrkar laipui Health Ministry phalna a ngai thin tih sawiin, “Tawngpawng inthawn ngawt hi a rem si lo a. Hetiang paltlang tur hian pawisa thil ah chuan tam tak a ni ang. A lawmawm khawp mai,” tiin, tunhnaiah Ireland leh Taiwan atangin oxygen concentrator dawn a nih tawh thu a sawi bawk.

Tun dinhmunah Oxygen Concentrator hi hman mai tur a la awm tam tawk thu leh Mizoram tan thlaphanawm a la nih loh thu sawiin Health Minister chuan, “Heti chung hian Oxygen Concentrator bakah Oxygen pangngai kan sawi fo tawh thin angin kan nei tho bawk a, tunah chuan nasa lutuka thil a awm te a nih loh chuan kan indaih rih ka ring,” a ti.

Mizoram sawrkarin District tin deuh-thaw ah Oxygen Plant din turin North East Special Infrastructure Development Scheme (NE-SIDS) hnuaiah hmalak mek a nih thu sawi bawkin Dr. R. Lalthangliana chuan, “Oxygen Plant kan buaipui mek a. Mahse, a buaithlakna chu ram-pawn-a mi company te kha hripui leng avangin an lo kal theih mai loh avangin kan bahlah rei deuh a. Tunhnai maia COVID-19 thawh hnihna a thlen vang pawh nilo in nikum atangin kan buaipui tawh a ni,” a ti a, “Mizoram chu mihring kan la tlem a, Oxygen Plant hi kan din zawh vek theih chuan, Pathian zarah kan zia viau chuan ka ring,” a ti bawk.

Hetih lai hian Health & Family Welfare Department Director Dr. H. Lalchungnunga chuan nikum khan sawrkar laipui kaltlangin Mizoram hian a bik taka Oxygen Concentrator a dawnte chu Hospital tel lovin a vaia belhkhawmin Primary Health Centre (PHC) hrang hrangah 528 semchhuah a nih tawh thu a sawi a. Heng bakah nikum-a leisa an la sem chhuah loh, mamawh thuta hman mai theih tur an la kawl that thu a sawi a. Nikum vek khan Health Ministry kaltlangin Mizoram sawrkar hian Oxygen B-Type Cylinder 524 leh D-Type Cylinder 100 an dawng tawh niin a sawi bawk.