Doctor sawnna tur Order sut leh turin ngen

Serchhip District NGO Coordination Committee chuan Serchhip District Hospital atanga Dr. Lalnunhlima Khiangte sawnna tura Order tihchhuah chu sut leh turin sawrkar an ngen a, hei hi tih hlawhtlin a nih ngei theih nan theihtawp an chhuah zel dawn tih an sawi.

Nimin khan Serchhip District NGO Coordination Committee hi an Chairman, Kawlthuama kaihhruaiin Serchhip Sub-Hqrs. YMA Conference Hall-ah an thukhawm a, he hunah hian YMA, MUP, MHIP, MZP leh MSU aiawhte telin tunhnaia Mizoram sawrkar-a Health & Family Welfare Department in Doctor te awmhmun siksawina a tihchhuaha Serchhip District Hospital-a thawklai Dr. Lalnunhlima Khiangte, Clinical Pathology zirchhuak hlim, Serchhip-a a hna a zawm leh hmaa Lunglei Civil Hospital-a awm tura sawn a nih chungchang an sawiho a. Dr. Lalnunhlima Khiangte hi Serchhip District Hospital mamawhna avangin Endoscopy leh Ultrasound training lo nei tawh nia sawiin, tuna Clinical Pathology a zir leh hma pawh hian Endoscopy leh Ultrasound enkawltu a nih thin thu leh a zir leh chhung zawng pawh hian Ultrasound phei chu hman loha awmin Ultrasound tih ngai te pawh Aizawl lamah refer zel an ni nghe nghe tih an sawi a. Hei vang hian Dr. Lalnunhlima Khiangte hi Serchhip District Hospital-a awmzui ngei turin District mipui aiawhin an ngen tak meuh tih sawiin, Lunglei Civil Hospital-ah hian Pathologist hi pakhat a awmsa nghe nghe niin an sawi. Hei vang hian Dr. Lalnunhlima Khiangte sawnna tura Order tihchhuah tawh hi sut leh tura sawrkar ngenin, nimin vek khan ngenna lehkha hi sawrkar thuneitute hnenah an thlen nghal bawk a. He an ngenna hi tih hlawhtlin ngei a nih theih nan theihtawp an chhuah zel dawn tih an sawi bawk a ni.