Serchhip District-ah hri kai hmuhchhuah belh zel

Inrinni khan Serchhip District-ah hri kai mi mi 41 hmuhchhuah an ni a, an zinga 40 te chu SGI Pvt. Ltd. hnuaia thawk an ni.

Inrinni khan Serchhip District-a TrueNat Laboratory-ah Sample 33 enfiah niin heng atang hian hri kai mi 9 hmuh-chhuah an ni a, heng mite hi SGI Pvt. Ltd. hnuaia thawk tura Mizoram-a rawn lut, Kikawn-a awmlai leh inkhunghrang lai an ni. Inrinni vek khan Rapid Antigen Test hmangin Serchhip District-ah Sample 127 enfiah niin hri kai mi 32 hmuh an ni bawk a, an zinga mi 31 te chu SGI Pvt. Ltd. hnuaia thawk tur bawk niin Chhingchhip dai-a inkulh an ni thung a, hri kai tawh nen inkawm-hnaihna neih avanga inkhunghrang lai an ni a, hri kai hmuhchhuah dang pakhat hi Chhingchhip ami niin hri kai tawh nen inkawmhnaihna nei an ni.

Inrinni khan Serchhip District-a hri kai enkawl mi 2 te chu enkawl dam niin anmahni enkawlna hmun atanga chhuahtir an ni a, heng mite hi Nursing School CCC leh PTS CCC atangin mi pakhat ve ve an ni. Nimin khan hri kai mi 15 chhuahtir leh niin Nursing School atangin mi 5 leh 4C Chhingchhip atangin mi 10 an ni a, Nursing School CCC atanga chhuak te hi Serchhip Chanmari Veng leh Chhingchhip-a mi 2 ve ve bakah Keitum-a mi pakhat an ni.

Heti hian nimin thlenga Serchhip District-a hri kai hmuhchhuah chu mi 630 an tling ta a, an zinga mi 133 te chu enkawllai niin tunah hian mi 495 te chu enkawl dam an ni tawh thung a, hri kai zingah nunna chan mi 2 an awm tawh bawk a ni.