June 7, 2021 thleng Serchhip District-ah Inkhuahkhirhna kalpui chhunzawm a ni dawn

Mizoram sawrkar in COVID-19 hri leng avanga Mizoram puma June 7, 2021 zing dar 4:00 thlenga hman tur inkhuahkhirhna a siam chu Serchhip District-ah pawh hman nghal a ni dawn a, nimin khan Serchhip District Disaster Management Authority (DDMA) chuan Serchhip District-a inkaihhruaina tur bik a siam belh leh bawk.

Nimin a Serchhip DDMA leh sawmbik te Serchhip DC, Lalmuansanga Ralte hova Meeting hian inkharkhipna kalpui dan tur hrang hrangte relin a tlangpui thu in kalphung pangngai awmsa anga kal chhunzawm tur a ni dawn a. Eizawnna leh tul bik thil ni lova veivah leh inlenpawh khap tlat niin mahni chenna khua chhuahsana zin veivah khap tlat a ni dawn a, chhiat tawh leh damlohna thil-a zin ngai te chu VLTF hriatpuina lehkha nen an zin thei anga, heng bak loh theihloh a zin ngai te chu DC/SDO (Civil)/BDO-ten phalna an pe thei anga, hei hian College/University zirlaite Online Exam tura Internet Connection that zawkna pan te a huam lovang. Vantlang hmun leh Sakhaw biakna te khar chhunzawm a ni anga, chhiatni leh thatni kaihhruaina chu a ngai anga kalpui zui tur niin zan dar 7:00 atanga zing dar 4:00 chhung curfew a ni leh dawn a ni.

Eichawp dawrte chu nitin zing dar 5:00 atanga zing dar 8:00 thleng VLTF-te ruahmanna in a hawn theih anga, Thlai/chawhmeh zawrhna te chu nitin zing dar 05:00 atanga tlai dar 5:00 thleng hawn theihin Sa zawrhna chungchangah VLTF ten ruahmanna an siam anga, Dawr then-khat inhawn hun tur siam a ni bawk.

District Hqrs. a cheng/khawsa Lo leh huan-a feh tur leh Ranvulh/Sangha khawi tan phalna hranpa ngai lovin hnathawh phalsak an ni a, mahni Veng/khua VLTF hriatpuina lehkha ken thung tur a ni ang. Zing dar 9:00 hmaa khaw-chhung chhuahsan fel hman tur niin dar 4:00 hmaa khawchhung an luh phal a ni lo thung a, nileng-a hnathawh ngailo te tan chhun dar 12:00 leh chawhnu dar 1:00 inkarah khaw chhungah haw phal a ni bawk. Mahni In-a thil siamna (home based industry) hmunah te chuan a awm-chilhtute VLTF hriatpuina in an thawh phal a ni.