Latest News

COVID-19 hri leng mek ah tumah inthlahdah thei kan ni lo - Health Minister

Health Minister Dr. R. Lalthangliana chuan COVID-19 hri kai hmuhchhuah thar zingah Aizawl chhung ami tamin hri kai thar zinga zaa 70 lai ni mah se Mizoram hmun tinah COVID-19 hri kai hi report an awm thu sawiin, tumah inthlahdah thei kan nih loh thu a sawi.

Rural Development Department in Life Insurance Corporation of India (LICI) hnen atanga an hmuh PPE 1400 nimin-a MINECO-a an hlanna hunah he thu hi sawiin Health Minister chuan COVID-19 hri kai tharte zinga 70% chu Aizawl khawpui chhung ami ni mah se Mizoram hmun tinah he hri kai hi report an awm avangin tumah inthlahdah thei kan ni lo tih a sawi a, “Sawrkar ruahmanna thuawih taka kan zawm hi kan himna atana pawimawh tak pakhat a ni,” tiin mipuite dawhtheihna nen thuawih hram hram turin a ngen bawk.

Health Minister chuan Mizoram in kan mamawh em em PPE thahnem tak RD Department in LICI kaltlanga an lo hmu chu lawmawm a tih thu sawiin, PPE hi engtiklai pawhin kan mamawh a nih thu leh engemawzat chah mek chu a rawn thlen theih lawk loh avanga kan mamawh zual lai taka an dawng chu lawmawm a tih thu a sawi a. PPE hi tun dinhmunah ZMC-ah nitin 200 vel kan mamawh thu a sawi a. India ram pumah demand a san avangin duh angin a hmuh nghal zung zung theih thin loh tih sawiin, RD Department leh LICI chungah lawmthu a sawi bawk.

He hunah hian Rural Development Minister, Lalruatkima chuan Mizoram-in COVID-19 kan hmachhawnna kawngah RD Department chuan tangkai ve theih dan tur kawng hrang hrangin an dap tih sawiin, Life Insurance Corporation of India Hqrs., Mumbai-ah Corporate Social Responsibility (CSR) kaltlanga Mizoram tan hma rawn la tura an ngenna ngai pawimawhin PPE leh Three-Layer Mask tam tham tak an pek thu leh, Three-Layer Mask hi LLTF Duty te hnenah an sem tawh thu leh PPE pawh hi engemawzat chu CCCC hrang hranga duty-te hman tura an hlan tawh thu a sawi bawk.

Nimin a RD Department in Health Minister an hlan hi PPE Full Kit (PPE suit, pheikhawk khuhna, Face Mask, Face Shield, Waste Bag) 1310 leh PPE suit 90 a ni.

Comments

Popular News (Last 30 Days)