COVID-19 hri kai hmuhchhuah tam ber ni thleng leh

Niminpiah khan Mizoram-ah Sample 3641 enfiah niin COVID-19 hri kai 316 hmuhchhuah an ni leh a, tun tum hi darkar 24 chhunga hri kai hmuhchhuah an tam ber ni leh nikhat-a hri kai za thum aia tam hmuh a nih vawikhatna a ni.

Nimin khan ZMC Laboratory-ah Sample 1419 enfiah niin heng atang hian COVID-19 hri kai 163 hmuh an ni a, an vai hian Aizawl District-a Sample lak vek niin hri kai hmuhchhuah zinga 161 te chu taksa-a hri kai lanchhuahna neilo an ni a, mi pahnih erawh taksa-a hri kai lanchhuahna nei an ni thung.

District hrang hranga TrueNat Laboratory-ah niminpiah khan Sample 178 enfiah niin heng atang hian COVID-19 hri kai mi 13 hmuh an ni a, an zinga mi 10 chu Siaha District niin Lunglei, Mamit leh Khawzawl District-ah hri kai pakhat theuh hmuh an ni a, an vai hian taksa-a hri kai lanchhuahna neilo an ni a, inkhunghranna hmuna awmlai vek an ni.

Rapid Antigen Test hmangin niminpiah khan Mizoram-ah Sample 2044 enfiah niin hri kai 140 hmuhchhuah an ni a, an zinga 93 te chu taksa a hri kai lanchhuahna nei niin mi 47 te erawh hri kai lanchhuahna neilo an ni thung. Rapid Antigen Test hmanga hri kai hmuhchhuah 94 te chu Aizawl District ami an ni a, an zingah hian hri kaina hriatloh leh chhui ngai 28 an awm a ni.

Lawngtlai District-ah COVID-19 hri kai 26 hmuh niin an zinga 21 te chu Kamalanagar-I ami niin hri kai tawh nen inkawmhnaihna nei an ni a, midang 5 te hi khaw hrang hrang ami niin hri kai tawh nen inkawmhnai vek an ni bawk. Kolasib District-ah hri kai mi 9 hmuh niin State pawn atanga rawn haw mi pakhat tihloh chu hri kai tawh nen inkawmhnaihna nei an ni a, Serchhip District-ah hri kai mi 7 hmuh an ni bawk. Lunglei District-ah hri kai pahnih hmuh niin Mamit District-ah State pawn atanga rawn haw hri kai pakhat hmuh a ni a, Khawzawl District-ah hri kai tawh nen inkawmhnaihna nei hri kai pakhat hmuh a ni bawk.

Heti hian Mizoram-a COVID-19 hri kai hmuhchhuah chu mi 10,936 zet an tling tawh a, nimin khan Mizoram-a hri kai enkawl zingah mi 64 te chu enkawl dam leh niin nizan dar 10:00 thlenga hri kai enkawl dam chu 8292 an tling tawh a, hei hi hri kai hmuhchhuah tawh zawng zawng atanga chhutin za zela 75.82 a ni a, tunah hian hri kai enkawllai 2610 la awmin hri kai zingah nunna chan mi 34 an awm tawh bawk a ni.