Chhingchhip-ah CCCC din

Serchhip District-a Chhingchhip khua chuan an khuaa COVID-19 hri kai te enkawlna turin Community Covid Care Centre (CCCC) an siam a, mimal leh pawl thahnem takin hemi atan hian an remchan ang te an thawhkhawm a ni.

Serchhip atanga KM 24 vela hla, Chhingchhip khua ah hian tunhnaiah COVID-19 hri kai mi thahnem tak hmuhchhuah an ni tawh a, heng hri kai hmuh-chhuah te hi In lama inkhunghran tir an nih loh chuan Serchhip lamah enkawl tura rawn hruai an ni thin a, hetianga khawdang ah te hri kai enkawl tura indah zel hian harsatna tam tak a siam avangin Chhingchhip-a Kohhran hrang hrang leh tlawmngai pawl hrang hrangte chuan COVID-19 hri kai te enkawlna atana CCCC siam tur hian budget intukin CCCC hi din a ni ta a ni.

He CCCC-ah hian Chhingchhip PHC-a thawk ten damlo enkawl hna hi thawkin mimal leh chhungkaw thahnem takin mamawh tur hrang hrang an thawh bakah Bialtu MLA leh Deputy Speaker, Er. Lalrinawma chuan Rs. 70,000 pein, Medical Team Support nan Rs. 30,000 a pe bawk.

Chhingchhip Village Level Task Force (VLTF) kaihhruaina hnuaia din CCCC/4C-ah hian Inrinni zan khan hrikai enkawl tur dahluh tan niin tun dinhmunah mi 15 enkawl mek an ni a, hri kai enkawl te ei leh in leh damdawi man zawng zawng hi mipui thawhkhawm atangin a thlawn veka pek an ni a, Chhingchhip VLTF te chuan he 4C an din chungchangah tanpuina petu zawng zawng chungah lawmthu an sawi a ni.

Chhingchhip atanga thudawn danin an khua atang hian tun thlengin COVID-19 hri kai hmuhchhuah mi 49 awm tawhin heng zinga 29 te chu khawtual mi niin midang 20 te hi Company hnuaia hnathawk tura lut an ni a, tualchhung mi hri kai 29 zingah hian mi 6 enkawl dam ni tawhin hri kai enkawllai mi 23 an la awm mek a, an zinga mi 15 te chu tuna CCCC-ah hian en-kawl niin midang te hi Serchhip-a Nursing School CCC-ah enkawl an ni thung.