Serchhip District-a ASF lenna hmun ah Vawk thi 58 chhinchhiah a ni tawh

Darkar 24 kalta chhungin New Serchhip-ah Vawk 4 thi lehin Serchhip District-a African Swine Fever (ASF) lenna hmuna Vawk thi chu 58 an tling tawh.

Serchhip-a AH&Vety Department chhinchhiahna atanga a lan danin nimin chhun dar 1:00 atanga chhiarleta darkar 24 kalta chhung khan Serchhip District-a ASF hri lenna hmuna Vawk thi chhinchhiah hi 5 awmin an zinga 4 te chu New Serchhip huamchhung ami niin Chhiahtlang-ah Vawk pakhat a thi bawk a, heng te nen hian Serchhip District chhunga ASF lenna hmuna Vawk thu chu 58 an tling ta a ni. Serchhip District chhunga African Swine Fever (ASF) hri lenna hmuna Vawk thi tamna ber East Lungdar-ah chuan Vawk 23 thi tawhin New Serchhip-ah Vawk 13 a thi tawh bawk a, Keitum-ah Vawk 9 thi in Thenzawl leh Chhiahtlang-ah 6 ve ve a thi tawh bawk a, Vanchengte-ah Vawk pakhat a thi tawh bawk a ni. Heng ASF vanga Vawk thi awmna finfiah tawh khaw 6 atangah hian Vawk talh leh a sa zawrh te khap niin Vawksa thawnchhuah te pawh khap a ni tawh bawk a ni.

Serchhip DVO, Dr. R. Lalmakthanga chuan African Swine Fever (ASF) avanga Vawk thi awmna finfiah tawh ah chuan hri lenna atanga KM khat (1) huamchhung chu hri lenna hmun, Infected Area-ah puangin Vawk thi reng reng te chu uluk taka damdawi nen sawngbawla phum tur a ni tih a sawi a, Vawk ei tura talh leh a sa thawnchhuah reng reng pawh khap nghal zel a ni tih a sawi a, tunah hian Serchhip Town chhunga Chhiahtlang leh New Serchhip te chu Infected Area-ah puan ni tawh mah se Serchhip Area tak chu puan ala nih ve loh thu a sawi a, amaherawh chu mipuite erawh fimkhur a tul thu a sawi bawk.

Dr. R. Lalmakthanga chuan Vawk thi Sample enfiahna atan hian Rapid Test Kit an neih thu sawiin, hetah hian ASF hri kai chu hriat theih a nih thu leh a confirm na atan erawh hman theih a nih loh thu a sawi a, amaherawh chu Infected Area-a Vawk thi te erawh chu hri kai anga ngaih an nih tawh thu leh an taksa zai hawn leh pawh hri ti darh thei a nih avangin zai hawn pawh rem tih a nih loh thu a sawi bawk.

Hetihlai hian Serchhip District chhunga khaw 6-a chhan hriatloh a Vawk thi pawh 15 a tling tawh bawk a, chhan hriatloh a Vawk thi tamna ber Serchhip-ah Vawk 7 thi tawhin Buangpui-ah 3 leh North Vanlaiphai-ah 2 a thi tawh a, Kanghmun South leh Chekawn-ah Vawk pakhat ve ve a thi tawh bawk a ni.