Chanchin thar thenkhat :

Central YMA in hma la tura ngenna siam

Central YMA chuan YMA Kumpuan ‘Zirna Uar’ a nih angin June - July, 2020 chhunga Under-Graduate/Post-Graduate Examination Online-a neih turah Sub-Hqrs., Group leh Branch YMA te chu an huamchhung theuha an Member ten exam tha taka an hmachhawn theih nan tan la theuh turin an ngen e. Zirlai ten Internet Connection leh zirna atana tul dangte an neih ngei theih nan tan la tlang turin an chah bawk. Online exam-ah hian paper-a an ziah, an chhanna an dah leh a ngai tih sawiin, heta tana thil tul, paper lei/neih kawngah zirlaite’n harsatna an tawk nia a lan avangin zirlai ten awlsamna an hmuh theih nan hma la theuh tura beisei leh ngen an nih thu a tarlang bawk.

Lirthei chesual-ah 1 boral

Nimin zing dar 8:30 vel khan Thenzawl atanga KM 12 vela hla Kanghmun South khaw dai-ah Car pakhat chesualin mi pakhat in nunna a chan. Thenzawl-a Vantawng chanchinbu Editor, Liantluanga Renthlei hnen atanga thu kan dawn danin, nimin zing dar 8:30 vel khan Aizawl atanga Lunglei pana kal Car, Toyota Fortune (MZ 01-U-7072) chu Thenzawl atanga KM 12 vela hla, Kanghmun South khaw thlen hma lawkah che-sualin kawng thlang-ah meter 90 vel zet a lum a, a hmunah lirthei khalhtu Lalnundika (23) s/o Lalnunfela, Kawrthah, tuna Aizawl Vaivakawn-a khawsa mek chu a boral nghal a, he Motor a chuang Lalchhanhima (22) s/o Lalthazuala Aziawl Kanan Veng chuan hliam na vaklo tuarin, Then-zawl CHC-ah First Aid pek a ni bawk. He Motor hi Jenny Lalthansangi, Vaivakawn ta niin Lunglei-a Office dawr tura kal an ni.

VITRA-C 500 a himlo tih sawi

Deputy Commisioner of Food Safety leh Health Department-a Joint Director (F&D) chuan thuchhuah siamin Damdawi zuartu pakhat, Sanatra Health Care, Dehradun (Uttarakhand)-in a zawrh-chhuah Vitra-C 500 (Vitamin C leh Zinc inpawlh) chu mihring ei atan a him tawk lo tih hmuhchhuah a ni tih a tarlang a. Hei hi a zuartu Sanatra Health Care pawhin hriain a zawrhchhuah tawh zawng zawng koh kirna a tichhuak nghal tih a tarlang. Hei vang hian Vitra-C 500 Tablets/Jar -te chu Mi-zoram-a damdawi zuartu zawng zawngin an kawl a nih pawhin an hralhchhuak tawh tur a ni lo tih a tarlang a, an kawllai te pawh bialtu FDA Officer-te hriatpuina in an laknaah an thleng leh vek tur a ni tih a tarlang bawk.

CMRF sum dinhmun

Nimin thleng khan Mizoram-ah COVID-19 hri leng dona atana Chief Minister's Relief Fund a sum lut chu Rs. 23,55,28,954/- ni tawhin hemi atang hian Rs. 22,25,10,970/- hmanral a ni tawh a, tunah hian sum hmanbang Rs. 1,30,17,984/- ala awm bawk.

Centre atan 2 pawm leh

Khelo India Centre (KICs) atan Ministry of Youth Affairs and Sports, Govt. of India chuan Regional Sports & Training Centre, Football Academy, Kolasib District leh Boys Hockey Academy Kawnpui, Kolasib District chu a thlang a, Khelo India Centre(KICs) enkawlna tur sum hi Director, Sports & Youth Services Mizoram chuan Sports Authority of India kaltlangin Centre pakhat tan cheng nuai sawm ve ve a dawng dawn a ni.