Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Health Minister in ZMC-a inbuatsaihna tur a enfiah

Health Minister Dr. R. Lalthangliana chuan Covid-19 Second Wave kan hmachhawn mek leh Third Wave lo thleng thut thei chungchanga Zoram Medical College (ZMC) lamah inbuat-saihna tha zawk kan neih theih nan Zirtawpni tlai khan ZMC hi a tlawh.

Health Minister hian Hospital-a hman tur Transformer lian leh Diesel Generator lian dahna tur laih mek te, Zoram Medical College-a Oxygen Generating Plant siam thar 200 LPM, kar liamtaa bunfel tawh te chu tlawhin Mizoram dinhmun thlirin hman-hmawh taka Oxygen Generating Plant dang pakhat bunna tur hmunhma siam mek a tlawh nghal bawk a. Hei hi 300LPM bunna tur niin, a dung leh vang metre 7 leh a san zawng feet 5 leh a chanve tur a ni a. Hnathawktute chu a rang thei ang bera thawk zo turin a chah nghal bawk. Health Minister chuan Morgue House pawh mumal taka siam a duh thu leh Oxygen siamna hmun hi Hospital nen a inhlat tur a nih loh thu a sawi a ni. 

Hemi hnu hian ZMC Director Office-ah Covid-19 Second Wave kan hmachhawn mek leh Third Wave lo thleng thut thei ah Covid veite enkawlna hmunpui ber ZMC lamin inbuat-saihna tha zawk an neih theihna tura hmalak dan kawng hrang hrang an sawihozui nghal a. Health Minister chuan Covid vei kan pun belh zel avangin Secondary ICU pawh 50 atanga 60 vel awm thei se, kan pun dan azirin ngaihtuah belh zel nise a ti a, ICU pangngai 34 bakah Third Wave lo thleng leh thut thei atan 25 dang kan lo buatsaih lawk a ngai tih pawh sawiin, Pathian avang chauhin Mizoram hi Covid avanga thihna ah North East State-a dinhmun ziaawm berah kan la ding mek a, thihna chung-changah kan rate a la hniam ber hi Pathian khaw-ngaihna vang a ni, a ti bawk.

Comments

Chhiar Hlawhte