Latest News

Chanchin thar thenkhat :

MKHC in CM an kawm

Mizoram Kohhran Hruaitute Committee (MKHC) hruaitute chuan nimin khan Chief Minister, Zoramthanga chu a Pisa-ah hmuin, COVID-19 hri leng thawh hnihna laka mipui an him zawk nan leh, he hri leng nasa taka darh zau zel chu chhut chah a nih theih nan sawrkarin inkaih-hruaina khauh zawk kalpui se tiin an ngen a. MKHC hruaitute chuan Mizorama COVID-19 hri kai nasa taka an pung chho zel en hian hun reilote chu tun aia khauh lehzual zawkin sawrkar hi a kal a ngai tawh nia an hriat thu sawiin, Thing-tlang hmun thenkhat, hrileng boruak a ziaawm zawkna ah chuan thlai chi tuh hunlai a nih avangin inthlahdul a rem zawk thei a, mahse khawpui hrang hrangah case a pun chhoh zelna ah te chuan hun engemaw chen chhung chu khauh taka inkhuah-khirhna hi kalpui tul an tih thu an sawi a ni.

Chief Minister chuan an rawtna chu kan zavai tana tha tur nia a hriat thu leh a tawmpui thu a chhangin, an rawtna hrang hrangte chu sawr-kar in a ngaihtuah zui turin buatsaih a thehlut turin a lo ngen bawk a ni.


MHIP in chawimawi

MHIP General Hqrs. chuan tunlai hripui len avanga mi zawng zawng kan raltit em em laiin CT. Ramnunmawii d/o Thangluaia, Ruan-tlang (Delhi-a LLB zirlai) chuan COVID-19 hri a kai tawhloh hnuah COVID-19 hrikai enkawltu nei lo, Burma atanga raltlan Lalsiami (93) chu khawngaiha enkawl tura a nunna thapa a inpe chu ropui an tih thu an sawi a. A thiltih an ngaih-hlut zia leh chawimawina entirnan Rs.3000/- an hlan bawk.


Online-a Tui bill pekna hawng

Lawngtlai khawpui chhung ami ten PHE Department hnuaia Online hmanga Tui Bill an pek theihna tura ruahman, Online Water Tax Payment System chu nimin khan Lawngtlai DC, Dr. Andrew H. Vanlaldika chuan Lawngtlai-ah a hawng a, hri leng karah mipui ten tangkai taka an hman theih a beisei thu a sawi bawk.


MPYCC in pawi tih thu sawi

Congress Thalai, MPYCC chuan COVID-19 hripui khawvel puma a thawhkhatna nikum-a a len tum khan mithiamten thawh hnihna leh thawh thumna (2nd Wave leh 3rd Wave) a lo thlen tur thu vawi tam inrinlawkna 'warning' min hrilh chu kan ngaihthah avangin Mizoram-ah khawtlang-ah hripui nasa taka a taidarh ta chu pawi an tih thu an sawi a, Mizoram luhka-ah Mizoram sawrkar chu a inthlahdah rei lutuk niin an sawi bawk.


Random Test titawp leh rih

COVID-19 hri leng mek chu vantlang ah a darh tawh tih hriat a nih hnuah sawrkarin Random test a kalpui chu tihtawp a ni rih tih Health Department Special Secretary chuan thuchhuah siamin a tarlang a, Random Testing neih tawhna Siaha leh Tlabung-ah te Community spread a awm ngei tih chian nan hri kai hmuhchhuah an tam hle a, nimin-a Champhai-a Sample enfiah 123-ah hri kai an awmlo thung.


Harsatna tawk mi 111 awm

Lawngtlai atanga Siaha District Zero Point pawh tur NH. 54 kawng laihzauh hna thawh mek ah zangnadawmna vanga harsatna tawk, Lawng-tlai DC in thuneitu sang zawka a thlen mi 111 a awm mek. Thudawn danin kawng laih zau in a tihchhiat ram neitute hnenah zangna-dawmna pek a ni a, an harsatna tawh te hi a theih ang angin chinfel sak an ni a, mahse an chinfel mai theih loh, thuneitu sang Arbitator-ah case 111 thehluh a awm nia thudawn a ni. Lawngtlai DC Dr. Andrew H.Vanlaldika chuan tuna ram lak tur a tel lo, a taka hnathawh hun a an ram tihchhiatsak an awm a nih chuan On the Spot Purchase hmangin, zang-nadawmna tihfel sak theih a ni tih sawiin, mipuite chu mangang lo turin a chah bawk a ni.

NH. 54, Lawngtlai to Zero Point (Siaha District) inkar hi KM 39 a thui niin, hnathawktu Power Mech Projects Ltd. hotute chuan zangna-dawmna vanga khawih theih loh KM 6 chuang a awm thu an sawi a, cheng vbc. 446 senna tur ah hian hnathawh tur a ruahman atangin 6% vel thawh zawh a ni tawh a ni.

Comments

Chhiar Hlawhte