Latest News

Chanchin thar thenkhat :

DC in Screening Point tlawh

Mamit District Bawrhsap, Dr. Lalrozama chuan nimin khan State dang atanga Mizoram rawn lutte COVID-19 an kai leh kailoh test-na hmun, Kanhmun Screening Point leh Assam leh Tripura atanga Mizoram luhna hmunte a tlawh a. Kanhmun Screening Point-ah hian Emergency thil a awm a nih loh chuan chawhma dar 10:00 atanga chawhnu dar 3:00 thleng Medical duty-in dah niin hemi zulzui hian Medili leh Damcherra Gate pawh kaltlang phal a ni a. Kanhmun Screening Point-ah hian COVID-19 hri kai hmuhchhuah te Covid Care Centre (CCC)-a thawn chhoh hma-a an lo awm lailawkna tur, Isolation Room leh tuldanga Medical-te hman atan Bawrhsap hian Rs. 90,000/- a hlan nghal bawk.


Cluster Operation kalpui

Tun thla ni 3-a Siaha khawpui chhunga Rapid Antigen Test hmanga Random Test neih ah CO-VID-19 hri kai mi 30 zet hmuhchhuah an nih avangin nimin atang khan Medical Team ten Siaha-ah Cluster Operation an kalpui a, COVID-19 hri kai tamna Veng, New Colony leh College Vaih-ah Medical Team te hian inkulhin, MTP te tanpuina in Primary leh Secondary contact zawng zawng zawngchhuakin an Sample enfiah vek a ni dawn a, hri kai hmuhchhuah hnuhnung berin CCC a chhuahsan thlengin hna hi an thawk anga, chumi hnuah Veng dang-a insawn zel turin ruahmanna siam a ni.


Mipui zahlohna ah ngai

Congress Legislature Party Leader, Zodin-tluanga chuan thuchhuah siamin Civil Hospital, Lunglei tana RT-PCR pek hman tangkai loha a la awm reng chu mipui zahlohna leh sawrkarin tangruala hripui do a duhlohzia tilang chiangtu a nih thu a sawi a. COVID-19 hri leng dona kawngah chhan tha tak a awm a nih loh chuan a pawng a puia sawrkar sawisel a duh ngai loh thu sawiin, sawrkar ringawt chet tir loa eptu party-te pawh an theihna zawn theuha hripui leng doa thawk ve tur an ni tih chu a ngaihdan a la nih reng thu a sawi bawk.


ZPM in MLA lakluh thuai phut

ZPM Thalaite chuan Serchhip bialtu MLA atana thlan thar Lalduhoma chu chhuanlam dang siam lova MLA atana lalut thuai turin Assembly Speaker an phut thu an sawi. Nimin-a thuchhuah an siamah ZPM Thalaite chuan MLA atanga ban tir a nih hnuah Lalduhoma'n harsatna tam tak a paltlanga MLA atana thlantlin a nih thu leh lakluh a nih hun tur tiamchin awm lova sawn hlat a ni chu hriatthiam har an tih thu an sawi a. Assembly Speaker chu Lalduhoma MLA atanga bàn a nihna hi a kutah la ngamin, zah-a la lova puitling taka amah ngeiin MLA atan la lut tur leh chhuanlam dang siam lova lalut thuai tura an phut thu an tar-lang bawk a ni.


LADC-ah MDC 4 ruat thar

Lai Autonomous District Council-a Chief Executive Member in rawtna a siam angin Mi-zoram Larsap chuan Nominated MDC atan mi 4 a ruat thar a, heng mite hi H.Lalramfawna AOC Veng, Lawngtlai; Lalthanmawia Colney Lawngtlai-III; C. Biakthansangi, New Vengpui leh Z. Ngunchhini, Council Veng, Lawngtlai te an ni. Nikum Dec. 4-a LADC inthlanna neih ah khan Seat 25 awm ah MNF chuan Seat 20 la in sawrkar an siam a, CEM atan Manghmunga Chinzah chu lakluh niin CEM hian Nominated Seat 3 awm thin chu Dan in a phal anga 4 awm dilin April 26 khan mi 4 ruat phalna hi tih-chhuah a lo ni tawh bawk a ni.

Comments

Chhiar Hlawhte