Hri kai thar leh dam awm

Niminpiah-a Serchhip District-a Sample enfiah atangin COVID-19 hri kai pakhat hmuh belh niin nimin khan hri kai pakhat enkawl dam a ni thung.

Niminpiah a hri kai hmuhchhuah thar hi TrueNat Laboratory-a Sample enfiah atanga hmuh niin BSF sipai a ni a, tunhnaia State pawnlam atanga rawn lut a ni a, taksa-a hri kai lanchhuahna neilo a ni. Hetihlai hian nimin khan Serchhip District-ah hri kai pakhat chu enkawl dam a ni a, hri kai enkawl dam tak hi Thenzawl-a hri kai hmuhchhuah niin Home Isolation-a enkawl a ni.

Heti hian nimin thleng khan Serchhip District-a hri kai hmuhchhuah chu mi 359 an ni ta a, an zinga mi 200 te chu enkawl dam ni tawhin tunah hian hri kai enkawllai 158 an la awm mek a, hri kai zingah nunna chan mi pakhat a awm tawh bawk a ni.

Serchhip District-a hri kai enkawllai mi 158 zinga 91 te chu Nursing School CCC-ah enkawl niin PTS Digital Class Room-ah mi 33, Horticulture College, Thenzawl-ah mi 16, Integrated Ayush Hospital, Thenzawl-ah mi 9 leh Home Isolation-ah mi 9 te an ni. Nimin khan Rapid Antigen Test hmangin Sample 92 enfiah leh niin hri kai hmuh an awm lova, TrueNat Laboratory-a sample enfiah result erawh hriat hman a ni lo thung.