Chanchin thar thenkhat :

Aizawl-a thlai man bithliah

Commerce & Industries Minister hova Ai-zawl khawpui-a thlai man bithliah chungchang lo rel tawh bawhzuiin Sa leh thlai man bithliahtu tur Committee chu nimin khan Aizawl DC, Dr. Lalhriatzuali Ralte hovin an thukhawm a, he hunah hian Sa leh thlai chi hrang hrang man tur bithliah in hei hi Aizawl Municipal Corporation (AMC) huamchhunga bazar ni lo awm leh hmasa ber tur, May 25, 2021 atanga hman tan nghal tur a ni ang. Veng tina Local Level Task Force te chuan anmahni huamchhungah he thupek kengkawh tur hian thuneihna an nei ang a. Dan bawhchhia te chunga hremna lekkawh chu Local Council te kutah dah a ni ang. He rate bithliah hi May thla leh June thla huam tur a ni ang.

Supply Minister in tlawh

Kolasib District-a Covid-19 hri kai hmuh-chhuah te enkawlna hmun, Jordan Home, Sethawn chu nimin khan Supply Minister, K. Lalrinliana chuan a tlawh a, an mamawh eitur leh thawktute hman tur bungrua chi hrang hrang- Arsa, Buhfai, Alu, Tel leh thildangte a hlan a ni. Jordan Home, Sethawn-ah hian Medical lam atangin thawktu 5 an awm a, chung zinga Doctor 1, Nurse 1 leh Multitask Helper 1-te chu hlawh nei lova inpe an ni a, Police duty 6 an awm bawk a ni. Tun ah hian COVID-19 hrikai mi 124 enkawl mek an ni a, Jordan Home CCC-ah hian mi 200 thleng enkawl theih tur a ruahman a ni.

Khawzawl-ah tanpuina sem

Khawzawl District chuan Chief Minister’s Relief Fund atanga sum dawn atangin inkharkhip kalpui meka hna thawk theilo, chhuanchham mai thei dinhmuna ding chhungkaw 693-a mi 2716 te hnenah nimin khan chhawmdawlna atan buhfai leh dal an sem a, hei bakah hian bialtu MLA leh Deputy Chief Minister, Tawnluia’n  a bial chhunga Village Level Task Force (VLTF) 24 te tana tanpuina pawisafai Rs. 2,30,000/- a pek chu nimin vek khan VLTF te hnenah semchhuah nghal a ni bawk.