RD Minister hovin Official ten Meeting an nei

Rural Development Minister, Lalruatkima chuan nimin khan District leh RD Block hrang hranga thawktu chu Virtual Meeting a neihpui.

He Meeting-ah hian District hrang hranga harsatna an neih leh hmalak tulna te bakah rawtna awmte sawiho a ni a. District hrang hrang leh RD Block hrang hrang ten ni 100 inhlawhna an kalpui dan thlirho niin MG-NREGS-ah May leh June, 2021 a thawh dan tur leh hmalak dan tur sawiho a ni a, MGNREGS hnuaia tuichhe paihna siamthat leh changkang leh awmze nei zawk tuichhe paih kalpui dan tur pawh presentation nena enho leh sawiho niin, State dang tih dante zir a ni bawk. Minister chuan a tul anga hmalak a duh thu sawiin, faina chungchangah pawh Mizo mipuiten hmasawnna tam tak kan nei zel te hi lawmawm a tih thu a sawi bawk.

District hrang hranga ruahtui khawl (Jal Shakti Abhiyan - Catch the Rain) pawimawhzia inzirtirna leh hmalak dan report ngaihthlak a ni a, hmalak a tulna te leh hmalak zel dan tur pawh sawiho a ni bawk a. MGNREGS hnuaia Amrit Mahotsav Weekly Activities, India ramin Independent a hmuh champha vawi 75-na denchhena kum 2022 thleng kar khat zela hmalakna tur Central sawrkarin a rawn duan hrang hrang a RD Department hmalak dan sawiho a ni bawk.

Hei bakah hian RD Department leh Department dang ten thawhhona an neih (Convergence) hnuaia hmalakna hrang hrang pawh he hunah hian en ho-a sawiho a ni a,  a theih anga chaka hmalak a tul thu leh ruahmanna siam ang ang te a tul anga bawhzui nghal char char a ngaih thu sawi a ni. He Convergence-ah hian department hrang hrang telin, chung zingah chuan PHE, Agriculture, Horticulture, AH&Vety Department te pawh an tel a ni.

He Meeting-ah hian District hrang hrangin harsatna an neih leh hmalakna atana tul leh pawimawh an tihte sawiho a ni a. RD Minister chuan Department official theihtawp chhuahtute chungah lawmthu a sawi a, kan ram-in COVID-19 avanga harsatna nasa tak kan tawh lai mek a theihtawp an chhuah avanga thingtlang lam pawhin inhlawhna an hmu leh thei chu lawmawm a tih thu sawiin, hmalam hun atan pawh nasa zawka inbuatsaih tura officialte hi chahin, Fur lo thleng tur pawhin harsatna a thlen lohna tur leh chhuanchham kan awm lohna tur atana theihtawp chhuaha ruahmanna siam turin RD Department a Official te a chah bawk a ni.