Serchhip District-ah hri kai hmuh pung zelin Hri kai mi 431 hmuhchhuah an ni tawh

Serchhip District-ah COVID-19 hri kai hmuhchhuah an pung zel a, Zirtawpni-a Sample enfiah atangin hri kai 59 hmuh niin Inrinni-a Sample enfiah atangin hri kai mi 7 hmuh leh an ni bawk.

Zirtawpni khan Serchhip District atanga Sample lak 123 chu ZMC-a RT-PCR Laboratory-ah enfiah niin heng atang hian COVID-19 hri kai 46 hmuhchhuah a ni a, heng hri kai hmuhchhuah te hi Mizoram Police mi leh sa, West Bengal inthlanpui-a duty lo haw, PTS, Thenzawl-a khunghran lai mek an ni a, heti hian tunhnaia he inthlanna a duty Mizoram Police mi leh sa PTS-a rawn dah mi 263 atangin mi 158 te chuan hri an kai tawh a, an zinga mi 59 te chu enkawl dam an ni tawh a ni.

Zirtawpni vek khan Serchhip District-a TrueNat Laboratory-ah Sample 32 enfiah niin heng atang hian COVID-19 hri kai mi 10 hmuhchhuah an ni ve leh bawk a, heng hri kai hmuh te hi Horticulture College, Thenzawl-a thawk te niin inkhunghranna hmuna inkhunghrang lai an ni bawk. Zirtawpni khan Serchhip District-ah Rapid Antigen Test hmangin Sample 193 enfiah niin hri kai mi pathum hmuh an ni bawk a, heng atang hian hri kai mi pathum hmuh niin an vai hian Chhingchhip khua-a Sample enfiah atanga hri kai hmuh vek an ni a, mi pakhat hi State pawn atanga tunhnaia rawn lut niin midang pahnih hi hri kai nen inkawmhnaihna nei an ni thung.

Inrinni-a Sample enfiah atangin Serchhip District-ah hian COVID-19 hri kai mi 7 hmuh leh an ni bawk a, Serchhip-a TrueNat Laboratory-ah Sample 30 enfiah niin heng atang hian hri kai mi 2 hmuh niin mipa ve ve niin tunhnaia State pawn atanga rawn lut, inkhunghranna hmuna awmlai an ni. Rapid Antigen Test hmangin Inrinni khan Serchhip District-ah Sample 69 enfiah niin hri kai mi 5 hmuh an ni bawk a, Chhingchhip-ah hri kai mi 2 hmuh niin Kram Infracon Pvt. Ltd. hnuaia thawk, Mizoram pawn atanga rawn lut an ni. North Vanlaiphai-ah hri kai mi 2 hmuh niin mipa ve ve an ni a, pakhat hi hri kai nen inkawmhnaihna nei niin pakhat hi hri kaina hriatloh a ni a, Bungtlang khua ah tunhnaia State pawn atanga rawn haw pakhat chuan hri a kai tih hmuh a ni bawk.

Serchhip Nursing School CCC-a hri kai enkawl mi pahnih te chu nimin khan hri lakah fihlimin anmahni enkawlna hmun atangin chhuahtir an ni a, heng mite hi April 29-a hri kai hmuh niin PTS ami te an ni. Heti hian nimin thleng khan Serchhip District-ah hri kai hmuhchhuah chu 431 niin mi 268 te chu enkawl dam an ni tawh a, tunah hian hri kai enkawllai 162 awmin nunna chan pakhat a awm tawh bawk.