Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Chanchin thar thenkhat :

Oxygen mamawh la phuhru

Health Department-a Special Secretary, R. Lalramnghaka chuan Mizoram a Oxygen siam-chhuah ten Mizoram mamawh chu la phurhuk thei tura ngaih a nih thu a sawi. Health Department-a Special Secretary chuan tunah hian mimal sumdawng Oxygen siamchhuahna khawl nei mi 4 bakah Aizawl Civil Hospital, ZMC leh District Hospital thenkhatah te Oxygen siam-chhuahna a awm mek tih a sawi a. Heng atanga ni khat chhunga Oxygen siamchhuah theih zat chu Cubic Metre 4800 niin Mizoram mamawh chu a la phuhruk thei a ngaih a ni tih a sawi a, hei bakah hian Oxygen siamna khawl neih belh tura hmalak mek a nih thu leh Ventilator pawh ngaihtuah belh mek a ni tih a sawi a. COVID-19 Hrivei nazual te enkawlna, Remdesvir pawh vials 1000 chah mek a ni a. Kum 18 chin vaccine lak theih hun atana hman tur Vaccine pawh mamawh zat tih thlen a ni tawh tih a sawi bawk.


Supply Minister in tlawh

Supply Minister K. Lalrinliana chuan nimin khan Bairabi Covid-19 Screening point a tlawh. Covid-19 hrileng thawh hnihna dona kalpui mek a State pawn atanga lolut te endikna hmun, Bairabi Covid-19 Screening point a tlawhna ah hian Supply Minister chuan Screening Point a hri kai hmuhchhuahte Covid Care Centre lam a phurh chhohna turin MLA Fund atangin Ambulance a ruahman sak thu a sawi a, Medical Team-te hnen a hlan turin a tul ang ang buaipui a nih thu leh peihfel tep a nih thu a sawi a. Screening point-a thuktuten hna tha tak a an thawh theih nan Air Cooler a ruahman sak tur thu a sawi bawk. Supply Minister hian Bairabi Screening point a tlawh bakah hian Bairabi SDC Office sak mek a tlawh a, Meidum leh Pangbalkawna sawrkar hmalakna thenkhat endikin Bairabi-a FCS&CA Godown sak thar tur a ruahman chu a endik nghal bawk.


Random Test kalpui dawn

Mizoram-a COVID-19 hri vei zingah an kaina chin hriatloh leh chhui theihloh engemaw zat an awm tak avangin mipui mimir zingah he hri hi a darh nasa hle tawh nia ngaih theih a ni a, hei vang hian Disaster Management Act, 2005 in thuneihna a pek angin Mizoram Chief Secretary, Lalnunmawia Chuaungo chuan COVID-19 Random Testing chu an Test turte remtihna (consent) la chungin kalpui turin thupek a tichhuak.


HPC in Ar note semchhuak

Lunglei High Power Committee (HPC) in Poultry Farming for Eggs 2020-2021 Phase-II an kalpui mek hnuaiah nimin khan Lunglei North leh Lunglei South bial-a chhungkua 30 ve ve te hnenah Ar note 3420 semchhuah a ni a. He hma-lakna ah hian beneficiary pakhat hnenah hian Rs. 55,000/- hu Ar note, damdawi leh vaccine, Sign Board, Ar chaw leina pawisa fai leh Ar In sakna pawisa fai pek an ni. Hemi hmalam hian Phase-I ah Lunglei East bial-a chhungkua 39 leh Lunglei West bial a chhungkua 25 te hnenah Ar note 2880 sem a ni tawh bawk a ni.


Education Minister in tlawh

School Education Minister, Lalchhandama Ralte chuan nimin khan Aizawl MINECO-a MYC Office-cum-Coaching Centre leh Youth Centre sak mek chu tlawhin a hmunah hnathawh dan a enpui a. Mizoram-ah hian Youth Centre hi pathum sak mek niin Aizawl bakah hian Lunglei-ah cheng nuai 400 man leh Serchhip-ah cheng nuai 300 man sak a ni a, Serkawn-ah Coaching Cum Incubation Centre dah tum a ni bawk.

Comments

Chhiar Hlawhte