Latest News

Mizoram-a hri kai hmuhchhuah 6000 aiin tam tawh

Niminpiah khan Mizoram-ah Sample 2937 enfiah leh niin COVID-19 hri kai mi 140 zet hmuhchhuah leh an ni a, Mizoram-a he hri kai hmuhchhuah tawh pawh mi sang ruk an tling ta a ni.

Niminpiah khan ZMC Laboratory-ah Sample 637 enfiah niin hri kai mi 52 hmuhchhuah an ni a, an zinga mi 25 te chu hri kai nen inkawmhnaihna atanga hri kai niin midang 27 te chu tunhnaia State pawn atanga rawn haw an ni thung. Niminpiah khan District hrang hranga TrueNat Laboratory-ah Sample 131 enfiah niin hri kai mi 2 hmuh an ni bawk a, Lunglei District-a hmuh ve ve niin tunhnaia State pawn atanga rawn haw an ni thung.

Niminpiah khan Mizoram-ah Rapid Antigen Test hmangin Sample 2169 enfiah niin hri kai 86 zet hmuhchhuah an awm bawk a, Lengpui Airport Screening Point-a Mizoram rawn lut tur enfiah atangin hri kai mi 26 hmuhchhuah niin Aizawl District chhung hmundang ah hri kai 37 hmuhchhuah an ni bawk a, an zinga mi 19 te chu hri kaina hriatloh an ni.

Kolasib District-ah hri kai mi 12 hmuhchhuah niin an zinga mi 10 te chu Mizoram-a rawn lut tur Vairengte Screening Point-a lo enfiah atanga hri kai hmuhchhuah niin Phaisen Screening Point-ah hri kai pakhat hmuh a ni bawk a, Lunglei District-ah hri kai pakhat hmuh niin Lawngtlai District-ah hri kai mi 7 hmuhchhuah leh an ni bawk a, Serchhip District-ah hri kai mi 3 hmuh an ni bawk.

Heti hian Mizoram-a COVID-19 hri kai hmuhchhuah chu 6020 an tling ta a, nimin khan hri kai mi 44 te chu hri lakah fihlimin anmahni enkawlna hmun atanga chhuahtir an ni ve leh bawk a. Heti hian nimin tlai dar 5:00 thlenga Mizoram hri kai enkawl dam chu mi 4926 niin hei hi hri kai hmuhchhuah atangin za zela 81.83 a ni a, hri kai enkawllai 1079 an la awm mek thung a ni.

Hetihlai hian nimin khan Mizoram-a hri kai enkawl zingah nunna chan mi pahnih an awm a, nimin zing dar 5:45 vel khan J. Sapzinga (82) chu ZMC-ah a boral a, thudawn danin Champhai Rahsi Veng mi, J. Sapzinga hi April 28 khan COVID-19 hri a kai tih hmuhchhuah niin ZMC Non-COVID Ward-a hri kai hmuhchhuah te zingah a tel a, Pneumonia a neih bawk avangin nimin zing khan a boral zui ta a, Aizawl District-a hri kai tih hmuhchhuah niin Aizawl District Case-a chhiar a ni.

Nimin vek zing dar 9:20 khan Lalthlamuanzuala (49), Armed Veng South, Aizawl chu ZMC-ah hian a boral ve leh bawk a, Lalthla-muanzuala hian April 23 khan hri a kai tih hmuhchhuah niin a tuk-ah ZMC-ah hian dahluh a ni a, nimin zing khan a boral zui ta a ni. Heti hian nimin tlai thleng khan Mizoram-a COVID-19 hri kai hmuhchhuah zingah nunna chan mi 15 an awm ta bawk a ni.

Comments

Chhiar Hlawhte