Serchhip District-ah hri kai 294 hmuh an ni tawh

Nimin khan Serchhip-ah COVID-19 hri kai mi pahnih hmuhchhuah niin hri an kaina chhui mek a ni a, Serchhip District-a hri kai hmuhchhuah chu 294 an tling tawh.

Nimin khan Serchhip-ah Rapid Antigen Test hmangin Sample 19 enfiah niin heng atang hian hri kai mi pahnih hmuhchhuah an ni a, heng hri kai hmuhchhuah te hi hmeichhia ve ve niin pakhat hi Serchhip Hmar Veng mi niin pakhat hi Serchhip P&E Veng mi a ni thung a, hri an kaina hi chiang taka hriat a ni lova, hri kai pakhat zawk hi tunhnaiah Aizawl-ah a zin nia thudawn niin hri kai pakhat nen hian tunhnaiah inkawmna an nei bawk nia hriat a ni bawk. Nimin vek khan Serchhip District-a TrueNat Laboratory-ah Sample 4 enfiah niin nizan lam khan result pawh hriat hman beisei a ni.

Hetihlai hian niminpiah khan Serchhip District atangin hri kai mi 15 hmuhchhuah an ni bawk a, heng hri kai hmuhchhuah te hi Thenzawl-a Horticulture College sak hna thawk tura Assam atanga lo kal an ni a. Quarantine Facility a khunghran lai mek, symptom nei lo vek an ni. Hri kai hmuhchhuah te hi ZMC RT-PCR Laboratory a hmuhchhuah niin Thenzawl-ah an sample laksak an ni a, anmahni company lamin ZMC-a Sample dah tur Motor an intum theih avanga an sample te hi ZMC a endik an ni thung.

Heti hian nimin thleng khan Serchhip District-a COVID-19 hri kai hmuhchhuah chu mi 294 an tling ta a, an zinga mi 193 te chu enkawl dam ni tawhin tunah hian hri kai enkawl-lai mi 100 awm mekin an zinga mi 82 te chu Nursing School CCC-ah enkawl an ni a, midang 15 te chu Integrated Ayush Hospital, Then-zawl-ah enkawl niin In lama hri kai enkawl mi pathum an awm mek bawk a ni.

Serchhip District-ah hian hri leng avanga sawrkar hmunhmaa inkhunghrang mi 56 awm mekin mahni hmunhma-a inkhunghrang mi 221 an la awm bawk a ni.