Vawk thi la awm belh zel

Darkar 24 kalta chhungin Serchhip District-a ASF hri lenna hmunah Vawk 5 lai an thi leh a, a tam zawk chu Vawk puitling tawh an ni.

Serchhip-a AH&Vety Department hotute hnen atanga thu kan dawn danin darkar 24 kalta chhunga African Swine Fever (ASF) hri lenna hmuna Vawk thi 5 zinga 4 te hi New Serchhip-a thi niin a vai hian Vawk puitling vek an ni a, East Lung-dar-ah Vawk pakhat a thi ve leh bawk a ni. Heti hian Serchhip District-a ASF hri lenna hmun-a Vawk thi chu 66 a ni ta a, East Lungdar-ah Vawk 25 thi tawhin New Serchhip-ah 19 a thi tawh a, Keitum-ah 9 a thih bakah Thenzawl leh Chhiahtlang-ah 6 ve ve thi in Vanchengte-ah pakhat a thi tawh bawk a ni.

Darkar 24 kalta chhung khan Serchhip P&E Veng-ah Vawk thi pakhat a awm bawk a. Rapid Antigen Test hmanga enfiah a nih bakah hmunpui zawka enfiah zui turin a Sample lak a ni a, Serchhip District-a chhan hriatloh-a Vawk thi hi 17 a tling tawh bawk a ni.