Latest News

Vantlang kawngpui humhalh

Vantlang kawngpui humhalh

Nikum November thla vel atang khan Serchhip District Road Protection Squad te chuan Serchhip khawpui chhung Veng hrang hrang tlawhkualin Vantlang kawngpui dip-a thil dah a awm leh awmloh enfiahin hetiang thil lo dahhnawk te chu senghawi tura hriat-tir an ni a. Heng hma an lakna te hi a huam-tu Village Council-a hriattirna pek zui niin a tul anga hma la tura hriattir an ni bawk a. Hei mai bakah hian Vantlang kawngpui kam a lirthei dah te leh Ran In sa te pawh enfiah vek niin hetianga kan sawrkar thuneitute lam in hma an la hi a lawmawm hle mai a. Heng an hmalakna te hi a hlawhtlin theihna turin khaw-tlang mipuite pawh kan tanrual a tul hle a ni.

Kan hriat angin Serchhip khua hi ruahmanna awmsa lutuk lem lova thang kan ni a, tun thlengin kan khawpui thanna tur atan pawh ruahmanna siam ala awm lutuk lo niin a lang. Hei vang hian khawchhung inkalpawhna kawngpui kan neih te pawh a tlem in a awmchhun te pawh zim tak tak a ni deuh vek a, rikrum thil a lo thlen thulh ah pawh mihring leh lirthei chetvel a harsat phah fo a ni. Chutiang a nih hriaa kan thuneitu lam ten kan kawngpui neih ang ang te humhim a nih theihna tur leh mipui chetvelna dip thei turte senghawi tura hma an la hi a lawmawmin rah tha a chhuah ngei pawh a beiseiawm hle a ni.

Hetiang hian kan thuneitute hian mipui tan hma la thin mah se a hlawhtlinna tak tak chu mipuite ah thui tak a innghat tih kan hriat a tul hle mai a. Sawrkar tan hemi kawngah hian chak taka hmalak reng harsat hun pawh a awm thei, amaherawh chu mipuite hian he hmalakna hi keimahni tan zawk a pawi-mawh a ni tih hriaa hmalakna ti hlawhtlingtu ni tura rilru kan put zawk hi a tul hle a ni.

Comments

Chhiar Hlawhte