Serchhip bial-a bye-election lo awm turah INC in PC. Laltlansanga an din tir dawn

Mizoram Pradesh Congress Committee (MPCC) chuan Serchhip bial-a Assembly bye-election neih turah PC. Laltlansanga chu an Candidate tur a nih thu an puang a, heti hian Serchhip bial bye-election neih turah Political Party pathum chuan an Candidate tur an puang ta a ni.

Mizoram Pradesh Congress Committee (MPCC) hian nimin khan Aizawl-a Congress Bhavan-ah Political Session neiin he hunah hian an President, Lal Thanhawla chuan bialtu MLA ban a nih avanga Assembly bye-election neihna tur, Serchhip bial-ah PC. Laltlansanga chu  Congress Party Candidate a nih tur thu hi a puang a ni.

He hunah hian Lal Thanhawla chuan ngun taka an ngaihtuah hnuin an Sawrkar tla ta khan eirukna lamah hmingchhiatna an nei lo tih sawiin, amaherawhchu, Zu an zawrh tir avanga tla an ni tih a sawi a, “Zu zawrh kha tha kan tih vanga zuar kan ni lova, a in duh an awm reng a, Zu kha a tam tho si a, Zu chhia an in ai chuan thunun (control)-na hnuaiah Zu zawrh mai kha tha kan ti a, mangan zawrh a ni,” a ti a. “Kohhran pawi sawi hi kan duh lova, keini pawh Kohhran member vek kan ni a. Congress Party-a PAC thukhawm chuan ngun taka kan ngaihtuah hnuin Pathian leh mipui zara kan Sawrkar leh hunah Kohhran duh loh a nih chhung chuan Zu hi kan zuar tawh dawn lo,” a ti a ni.

Serchhip Bial-a INC Candidate tur PC. Laltlansanga hi July 11,1973-a piang niin a pa PC. Lalhawia (L) a ni a, Serchhip Hmar Veng-a seilian a ni. Zirna lamah kum 2001 khan MA (History) zo in Serchhip-ah Zirlai Pawl hruaitu a nih thin bakah MZP General Hqrs. ah pawh President hna a lo chelh tawh a, kum 2008-ah Politics-ah zuanglutin MNF a zawm a, MNF Thalai-ah President hna te pawh alo chelh tawh thin a ni. Kum 2014-ah Congress Party zawmin MPCC Communication Department-ah Chairman a ni thin a, tunah hian MPCC Secretary a ni mek bawk.

Heti hian Serchhip bial-a bye-election lo awm turah Party pathum in an Candidate tur an puang ta a, ZPM chuan Lalduhoma an din tir tur thu puang tawhin MNF chuan Vanlalzawma an din tir tur thu an puang tawh bawk a ni.