Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Valentine’s Day pualin Serchhip-ah mi tlawmngai ten thisen Unit 38 an pe

Kumin a Valentine’s Day pualin nimin khan damlo a mamawhte tana a thlawna Thisen pekna hun chu Serchhip-ah buatsaih niin mi tlawmngai ten thisen Unit 38 an pe a. Kum 2012 atanga kumin thleng hian Valentine’s Day pualin Thisen Unit 468 pek a ni tawh a ni.


Association for Voluntary Blood Donation (AVBD) Serchhip Branch leh Serchhip District Hospital Blood Bank tangkawp te buatsaiha Valentine’s Day puala thisen pekna hun hi Serchhip Blood Bank-ah huaihawt a ni a, he hunah hian pawl bik sawm awm lovin a duh apiangte tan thisen pekna hun hi hawn niin mi tlawmngai ten thisen Unit 38 an pe a, thisen petute hi mipa 15 leh hmeichhia 23 an ni a, heng tlawmngaia thisen pe te chungah hian AVBD Serchhip Branch hruaitute chuan lawmthu sawiin, midangte tana thisen pek chu midang nunna chhanna pawimawh tak a ni tih hriaa thisen pe zel turin mipuite chu an sawm a, nimin a thisen pe te hnenah hian he Ni puala siam Cake leh Rose an pe theuh bawk a ni.

AVBD Serchhip Branch hruaitute hnen atanga thu kan dawn danin kum 2012 atang khan Serchhip Blood Bank-ah hian Valentine’s Day puala a thlawna thisen pekna hun hi buatsaih tan a ni a, a tirah Serchhip Facebook User Group (SFUG) huaihawtin kum 2 chhung thisen pekna hun buatsaih a nih hnuah an pawl hming thlaka Serchhip Thalai Pawl (STP) tih a nih hnuah kum khat chu anni huaihawtna hian thisen pek leh a ni a, hemi hnu hian AVBD leh Blood Bank tangkawp huaihawta neih thin niin kum 2016 leh 2017 tihloh ah chuan thisen pekna hun hi buatsaih a ni chho ta zel a, kum 2017-ah hian a hrana Programme huaihawt a ni lo chungin mi 17 laiin thisen an pe a ni. Valentines’ Day puala thisen pekna ah hian kum 2012 khan Unit 45 pek niin kum 2013-ah Unit 76, kum 2014-ah Unit 85, kum 2015-ah Unit 17, kum 2017-ah Unit 78, kum 2019-ah Unit 65, kum 2020-ah Unit 64 leh kumin 2021-ah Unit 38 pek a ni a. Kum 2012 atanga kumin thleng hian Valentine’s Day-ah thisen Unit 468 pek a ni tawh a ni.

Valentine’s Day pual hian nimin khan Mizoram District hrang hrangah pawh thisen pekna hun hi buatsaih a ni a, Aizawl-ah chuan MSACS Project Director Dr. Lalthlengliani chuan thisen pekna hun hi hawngin Mizo thlalaite zingah thisen pek nachang hria kan pung zel chu a lawmawm a tih thu sawiin, Vawikhat mai ni lo, thla thum dan-a pe thin turin thalai te a sawm a ni.

Nimin-a thisen pekna hunah hian Mizo-ram puma Blood Bank 9-ah thisen Unit 467 pek a ni a, thisen petute hi mipa 295 leh hmeichhia 172 niin thisen dawng tam ber Civil Hospital Blood Bank chuan Unit 132 an dawng a ni.

Mizoram-ah hian Valentine’s Day puala Voluntary Blood Donation Camp hi tum 12 huaihawt a ni tawh a, kumtin thupui hrang hrang hmanga he hun hi hman thin niin kumin hian ‘Show Love, Give Blood’ tih chu thupui-ah hman a ni a, kumin hian Valentine’s Day hi Pathianni-ah a tlak avangin nimin khan hman a ni ta zawk a ni. Kum 12 chhunga Valentine’s Day puala thisen pekna hunah hian Mizoram-a Blood Bank hrang hrangah thisen Unit 7808 pek a ni tawh a ni.

Comments

Chhiar Hlawhte