Chanchin thar thenkhat :

Sawrkar Bill pakhat lut tawh

Tun thla ni 23 atanga Mizoram Legislative Assembly Budget Session neih tura ngaihtuah turin Bill pakhat a lut tawh a, he Bill lut hi ‘The Mizoram Licensing Veterinary Hospital and Clinic Bill, 2021’ a ni. He Session neih tur atan hian Zirtawpni thleng khan House chhunga chhan hi zawhna 352 lut tawhin ziaka chhan chi zawhna 165 a lut tawh bawk a, Resolution 54 lut tawhin paper lay tur 5 a lut tawh bawk a ni. Tarlan tawh angin tun tuma Assembly Session neih tan ni hian House-ah Larsap in thu a sawi anga, a tuk-ah Larsap thusawi chungchanga lawmthu sawina Motion sawiho in March 1-ah Budget pharh a ni anga, March 17-ah Session zawhfel a ni ang.

MSU dinchampha lawm

Mizo Students' Union (MSU) General Hqrs. chuan Zirtawpni kalta, Feb. 12, 2021 khan MSU dinchampha vawi 20-na lawmna leh Leadership Training chu Daifim Picnic Spot-ah an hmang a, he hunah hian an President, J. Lalmuanzuala chuan MSU hi kum 1986-ah R. Vanlawma hovin Mizoram MLA seat-ah General qouta a awmlohna tur chungchanga hmalatu ber ni mah se, Mei mit lova dinthar leh a nih, kum 2001 chu pawl din kum ah pawmin, kum upat ringawt chu an duh a nih loh thu a sawi a. Zirlai pawl-a an inhman chhan chu Ram leh zirlaite tan nise tiin, “Mahni inhai vurna leh sahmim puarna ringawt ngaihtuah chung chuan zirlai hruaitu tha a nih theihloh,” a ti bawk.

AMC-ah Campaign hun tawp

Aizawl Municipal Corporation (AMC) in-thlanna naktuk, Feb. 16-a neih tur atana Campaign theih hun chu nimin tlai khan a tawp ta a, naktuk zing dar 7:00 atangin Ward hrang hrang ah mipui ten Vote an thlak dawn a ni. Campaign theih hun tawp ni hi Pathianni a nih avangin Political party hrang hrangte chuan nimin khan Programme an hmang lo a, Inrinni chawhnu lam khan Party hrang hrangte chuan kawtthler-ah te campaign tawp kharna hi an nei hlawm a ni.

Tuirial lui-ah mi 2 tla

Sunhluchhip khua-a mi pahnih te chu Zirtawpni tlai khan Turial lui, Serzawl kai thlang-ah chesualin tui-ah an tla a, nimin khan ruang pakhat hmuh a ni. Thudawn danin Thangzela leh a u fa, Thanglal-duata te hi an thiante dangte nen Tuirial-ah hian hna thawkin an riak a, Zirtawpni tlai lam-a midang riak ve te bul-a Lawngleng-a an kal tur chu Lawng ti buk palhin tui-ah hian an chesual a, he Lawng-a chuang ve mi te chu an inhleuhchhuah theih laiin anni pahnih te hi tui-ah hian an pil zui ta a ni. Zirtawpni zan atang khan mi tlawmngai ten tui tla zawn hna hi an thawk nghal a, nimin chawhnu dar 2:00 vel khan Thangzela hi a ruang hmuh niin nimin khan an khua thlenpui a ni bawk. Hetihlai hian Thang-lalduata tui tla hi zawn mek niin khaw thenawm hrang hrangte pawhin an zawnpui bawk a ni.

Instructor Seminar zofel

Mizoram Amateur Taekwondo Association (MATA) buatsaih State Level Taekwondo Instructor Seminar vawi 15-na chu Inrinni khan MATA Hall, Aizawl-ah zawhfel a ni a, ni 2 awh he Seminar kharna hun hi Sports & Youth Services Department-a Joint Director, K. Lalhmangaihzuala chuan a hmanpui a ni. He Taekwondo Seminar-ah hian Aizawl bakah Serchhip, Lunglei leh Mamit District atangin Instructor 58 an tel a, Subject hrang hrang Training Plan siam dan te, Sports Psychology te, Taekwondo History te, Poomsae leh infiamna thar Speed kicking inel dan te leh Sports Academy chung changte an zir a, Instructor tura Written Test paltlang te hnenah Certificate hlan a ni bawk.