Tlangsang khua kum 107-na Health Minister in hmanpui

Kum 1914-a din Zampui tlangdung-a Tlangsang khua chuan kum 107 an tlinna lawmna ni 2 chhung awh buatsaihin nimin khan Health Minister, Dr. R. Lalthangliana chuan a hmanpui.

Tlangsang kum 107 tlinna pual inkhawm buatsaihah hian khuallian Dr. R. Lalthangliana chuan COVID-19 hripuiin khawvel a tuam mek laiin Mizoram chu India ram State zawng zawng zinga a tuar nep ber a ni tih sawiin, hei hi a chhan chu Zoram pawn Zofaten Mizoram hmangaih taka theihtawpchhuaha an tawng-taisakna rah a ni tih Zoram mipuiten an hriat thu a sawi a. Khawvel hmun hrang hranga Zofate inunauna sawhngheh hi Mizoram sawrkar tum pawimawh berte zing ami a ni tih sawiin, “Khawvel ramri kham hian kan inlaichinna leh inunauna hi a dal tur a ni lova, engtiklai maha inthlahthlam thiang kan ni lova, inpumkhat kan nihna hi kan chawi nung reng tur a ni a, kan tu leh fa, chhuan lo la awm zel turte pawh kan chah nawn fo a ngai a ni,” a ti bawk.

Kum 1975 May ni 3-a kum 26 mi ni-a Tlangsang khuaa Mizoram tana a nunna hlantu Cpl. Vanlalchhuanga Hnamte, Thenzawl thlan tlawhin amah hriatrengna thlanlung Tlangsang khuain an phun chu a hawng bawk a ni. Tlangsang khua hi Raja Hrangvunga'n kristian khua ni turin kum 1914 khan a din a ni.