Latest News

Halpuah leh Halmawi khapna kawnga hma la tha YMA Branch te chawimawina hlan an ni

Central YMA in Krismas leh Kumthar vuakvet-a halpuah leh halmawi khapna thupek Sawrkarin a chhuah bawhzui kawnga hma la tha Branch YMA 6 an thlanchhuah te hnenah nimin khan Home Minister, Lalchamliana chuan chawimawina thuziak leh tangkafai a hlan.

Central YMA Hall-a he hun hmanna ah hian Home Minister, Lalchamliana chuan halpuah, halmawi leh halthlawh khapna kawngah Sawrkar leh Central YMA thawhhona chu a tha hle tih sawiin, Sawrkar in khapna thupek a chhuah leh he khapna thupek bawhzui kawnga Branch YMA hrang hrang hnathawh te chu a hlawhchham lova, chuvangin Branch hma la tha te hriatpui leh lawmpui chu tha tiin he chawimawina programme hi neih a nih thu a sawi a. Halphuah leh halmawi haltute chu man an har viau a, chuvangin a halna In te pawh thubuai siamsak thei dan chu a ngaihtuahna ah a awm thu a sawi a. Central YMA nen tangdunin Sawrkarin kumin-ah chuan hma takin Awareness te neia hmalak tum a nih thu sawiin, Sawrkar leh YMA in a duhloh halpuah leh halmawi hal hi ti lo tura kum bul atanga rilru leh ngaihtuahna seng turin mipuite a chah bawk.

Home Minister chuan YMA hnathawh leh hmalakna hrang hrang te chu a hlu takzet tih sawiin, YMA tangkaina chu sawi sen a ni lo tih a sawi a, “YMA hi awm ta lo sela kan khawtlang hi eng ang nge anih ang tih hi ngaihtuahtham a awm niin ka hria,” a ti a. Tunhnaia Central YMA in kawng siam an endiknaa hmun thenkhata hnathawh dan a lungawithlak loh thu an tarlan chu ama mimal ngaihdan chuan lawmawm a tih thu sawiin, “Hmasawnna hnathawh kan vil zel loh chuan kan tu leh fa te tan ro tling tur kan hnutchhiah lovang tih a hlauhthawn awm a ni,” a ti. Sawrkarin Home Guards hnuaia Civil Defence lamah hmalak dan a zir mek thu pawh sawiin, hmalak hunah hmun tinah YMA chu Sawrkar kut ke tur an ni dawn tih a sawi bawk.

He hunah hian Central YMA President, Vanlalruata pawhin hun kal tawha Central YMA in hlawhtling taka halpuah leh halmawi khap kawnga hma a lak dante sawiin, halpuah leh halmawi khap chu kan tum chuan kan thei tih a sawi a, mipuiin thinlung atanga tih tak takna kan neih chu  heng halmawi leh halpuah khap hi hlawhtling thei a nih thu a sawi bawk.

Nimin-a he hun hmanna ah hian Home Minister hian Branch YMA 6 – Bawngkawn South, Bethlehem Veng, Dinthar, Khatla West, Kulikawn leh Muthi Branch YMA te hnenah thuziak leh tangkafai a hlan a. Tangkai fai hi Minister hian ama Discretionary Fund atanga a tum a ni. 

Comments

Chhiar Hlawhte