Thlai hralh ah hmalak zui ni thei se

Thlai hralh ah hmalak zui ni thei se

Serchhip District chhunga Tomato tharchhuah thahnem tak chu kar kalta khan Aizawl lama hralh turin thawnchhuah a ni a, hetianga kan thlai chingtute tharchhuah tam tham tak, khawdang-a thawnchhuah a nih theihna tura kan sawrkar in hma a lak sak hi a lawmawmin, nikum lam-a hri leng avanga harsatna kan tawh chhung pawh khan hetiang hian buaipui a lo ni tawh bawk a. Hetianga kan sawrkar in hma a lak avang hian thlai chingtute pawhin kumdang zawng aiin sum leh pai an rut hnemin an hlawkpui hle mai a, hlawhtling taka hetiang ruahmanna hi kal-pui theih a nih avangin thlai hrang hrangah te pawh hetiang hian hmalakna hi kalpui zel ni thei se a duhawm hle a ni.

Mizoram in thlai kan tharchhuah te hi damdawi bawlhlo leh thildang-a sawngbawl a nih thin loh avangin hralhchhuah vat vat a nih loh chuan awlsam te in a chhe mai thin a, a bikin tuna thawnchhuah Tomato bakah hian kan thlai thar tam- Zikhlum leh Antam te pawh ni 2/1 lek lekah a chhe mai thin a, a dahthatna tur hmun kan neih that tawk bawk si loh avangin a thar vanglai-ah chuan kan thlaichingtute tharchhuah hi tam tak tak chhia in man tlawm lutuk-a hralh pawh a tul phah fo thin a ni.

Amaherawh chu hri leng avanga harsatna kan tawh nasat lai khan thlai tharchhuah hralhna kawngah kan sawrkar in nasa taka hma lain a hlawhtlinna pawh kan hmu a, he hmalakna hi mipuite pawhin kan hlawkpuiin thlai tharlam tak tak kan hmuh theih phah bawk a ni. Chuvangin kan sawrkar pawh hian kuthnathawktute hma ngai hian kha ruahmanna kha chak zawka kalpui turin ruahmanna siam se a duhawm hle a ni.